అనుగ్రాహ్యాణాం జ్ఞానకర్మానురోధేన భగవతా తేష్వనుగ్రహవిధానాత్ తస్య రాగద్వేషౌ యది న భవతః, తర్హి తస్య రాగాద్యభావాదేవ సర్వేషు ప్రాణిష్వనుగ్రహేచ్ఛా తుల్యా ప్రాప్తా, నచ తస్యాం సత్యామేవ ఫలస్యాల్పీయసః సమ్పాదనే సామర్థ్యం, నతు భగవతో మహతో మోక్షాఖ్యస్య ఫలస్య ప్రదానేఽశక్తిరితి యుక్తమ్ , అప్రతిహతజ్ఞానేచ్ఛాక్రియాశక్తిమతస్తవ సర్వఫలప్రదాన సామర్థ్యాత్ । తథాచ యథోక్తానుజిఘృక్షాయాం సత్యాం, త్వయి చ యథోక్తసామర్థ్యవతి సతి, సర్వే ఫల్గుఫలాద్ అభ్యుదయాద్విముఖా మోక్షమేవాపేక్షమాణా జ్ఞానేన త్వామేవ కిమితి న ప్రతిపద్యేరన్ ? ఇతి చోదయతి -
యదీతి ।
మోక్షాపేక్షాభావాత్ తదుపాయభూతజ్ఞానాదపి వైముఖ్యాద్ భగవత్ప్రాప్త్యభావే హేతుమభిదధానః సమాధత్తే -
శ్రృణ్వితి ।