సత్యపి విక్షేపకే కర్మణి, కూటస్థాత్మానుసన్ధానస్య సిద్ధే కైవల్యహేతుత్వే, విక్షేపాభావే సుతరాం తస్య తద్దేతుత్వసిద్ధిరిత్యభిప్రేత్యాహ -

యః పునరితి ।

పూర్వోక్తవిపరీతత్వం లోకసఙ్గ్రహాదినిరపేక్షత్వమ్ । తదేవ వైపరీత్యం స్ఫోరయతి -

ప్రాగేవేతి ।

ససాధనసర్వకర్మసంన్యాసే శరీరస్థితిరపి కథమ్ ? ఇత్యాశఙ్క్యాహ -

శరీరేతి ।

తర్హి తథావిధచేష్టానివిష్టచేతస్తయా సమ్యగ్జ్ఞానబహిర్ముఖస్య కుతో ముక్తిః ? ఇత్యాశఙ్క్య యథోపదిష్టచేష్టాయామనాదరాత్ నైవమిత్యాహ -

జ్ఞాననిష్ఠ ఇతి ।

ఇతి దర్శయితుమిమం శ్లోకం ప్రాహేతి పూర్వవత్ । ఆశిషః ప్రార్థనాభేదాస్తృష్ణావిశేషాః ।