సర్వస్య శ్రేయఃసాధనస్య ముఖ్యగౌణవృత్తిభ్యాం యజ్ఞత్వం దర్శయన్నాదౌ యజ్ఞద్వయమాదర్శయతి -
దైవమేవేత్యాదినా ।
ప్రతీకమాదాయ దైవయజ్ఞం వ్యాచష్టే -
దేవా ఇతి ।
సమ్యగ్జ్ఞానాఖ్యం యజ్ఞం విభజతే -
బ్రహ్మాగ్నావితి ।
తత్ర బ్రహ్మశబ్దార్థం శ్రృత్యవష్టమ్భేన స్పష్టయతి -
సత్యమితి ।
యదజడమ్ అనృతవిపరీతమ్ అపరిచ్ఛిన్నం బ్రహ్మ, తస్య పరమానన్దత్వేన పరమపురుషార్థత్వమాహ -
విజ్ఞానమితి ।
తస్య జ్ఞానాధికరణత్వేన జ్ఞానత్వమౌపచారికమ్ , ఇత్యాశఙ్క్యాహ -
యత్సాక్షాదితి ।
జీవబ్రహ్మవిభాగే కథమపరిచ్ఛిన్నత్వమ్ ? ఇత్యాశఙ్క్య విశినష్టి -
య ఆత్మేతి ।
పరస్యైవాత్మత్వం సర్వస్మాద్ దేహాదేరవ్యాకృతాన్తాత్ ఆన్తరత్వేన సాధయతి -
సర్వాన్తర ఇతి ।
విధిముఖం సర్వమేవోపనిషద్వాక్యం బ్రహ్మవిషయమాదిశబ్దార్థః ।
నిషేధముఖం బ్రహ్మవిషయముపనిషద్వాక్యమశేషమేవార్థతో నిబధ్నాతి -
అశనాయేతి ।
బ్రహ్మణ్యగ్నిశబ్దప్రయోగే నిమిత్తమాహ -
స హోమేతి ।
బుద్ధ్యారూఢతయా సర్వస్య దాహకత్వాత్ విలయస్య వా హేతుత్వాదితి ద్రష్టవ్యమ్ ।
యజ్ఞశబ్దస్యాత్మని త్వమ్పదార్థే ప్రయోగే హేతుమాహ -
ఆత్మనామస్వితి ।
ఆధారాధేయభావేన వాస్తవభేదం బ్రహ్మాత్మనోర్వ్యావర్తయతిం -
పరమార్థత ఇతి ।
కథం తర్హి హోమః ? నహి తస్యైవ తత్ర హోమః సమ్భవతి, ఇత్యాశఙ్క్యాహ -
బుద్ధ్యాదీతి ।
ఉపాధిసమ్యోగఫలం కథయతి -
అధ్యస్తేతి ।
ఉపాధ్యధ్యాసద్వారా తద్ధర్మాధ్యాసే ప్రాప్తమర్థం నిర్దిశతి -
ఆహుతీతి ।
ఇత్థమ్భూతలక్షణాం తృతీయామేవ వ్యాకరోతి -
ఉక్తేతి ।
అశనాయాదిసర్వసంసారధర్మవర్జితేన నిర్విశేషేణ స్వరూపేణేతి యావత్ ।
ఆత్మనో బ్రహ్మణి హోమమేవ ప్రకటయతి -
సోపాధికస్యేతి ।
అపర ఇత్యస్యార్థం స్ఫోరయతి -
బ్రహ్మేతి ।
ఉక్తస్య జ్ఞానయజ్ఞస్య దైవయజ్ఞాదిషు ‘బ్రహ్మార్పణమ్’ ఇత్యాదిశ్లోకైరూపక్షిప్యమాణత్వం దర్శయతి -
సోఽయమితి ।
ఉపక్షేపప్రయోజనమాహ -
శ్రేయానితి
॥ ౨౫ ॥