ఇతశ్చ అవిద్వత్కర్తృకయోః సంన్యాసకర్మయోగయోః కతరః శ్రేయాన్ ? ఇతి ప్రష్టురభిప్రాయో భాతి, ఇత్యాహ -

ప్రతివచనేతి ।

కిం తత్ప్రతివచనం ? కథం వా తన్నిరూపణమ్ ? ఇతి పృచ్ఛతి -

కథమితి ।

తత్ర ప్రతివచనం దర్శయతి -

సంన్యాసేతి ।

తన్నిరూపణం కథయతి -

ఎతదితి ।

తదుభయమితి నిఃశ్రేయసకరత్వం కర్మయోగస్య శ్రేష్ఠత్వం చ ఇత్యర్థః ।

గుణదోషవిభాగవివేకార్థం పృచ్ఛతి - కిఞ్చేతి । అతః అస్మిన్ ఆద్యే పక్షే కిం దూషణమ్ ? అస్మిన్వా ద్వితీయే పక్షే కిం ఫలమ్ ? ఇతి ప్రశ్నార్థః । తత్ర సిద్ధాన్తీ ప్రథమపక్షే దోషమాదర్శయతి -

అత్రేత్యాదినా ।

తదేవానుపపన్నత్వం వ్యతిరేకద్వారా వివృణోతి -

యదీత్యాదినా ।

నిఃశ్రేయసకరత్వోక్తిరిత్యత్ర పారమ్పర్యేణేతి ద్రష్టవ్యమ్ । విశిష్టత్వాభిధానమితి ప్రతియోగినోఽసహాయత్వాద్ అస్య చ శుద్ధిద్వారా జ్ఞానార్థత్వాత్ ఇత్యర్థః ।