సముచ్చయవాదీ సీమాకరణమ్ ఆక్షిపతి -
నన్వితి ।
యావజ్జీవశ్రతివశాత్ ధ్యానారోహణసామర్థ్యే సత్యపి కర్మానుష్ఠానస్య దుర్వారత్వాత్ , ఇతి హేతుమ్ ఆహ -
యావతేతి ।
భార్యావియోగాదిప్రతిబన్ధాత్ యావజ్జీవశ్రుతిచోదితకర్మాననుష్ఠానవత్ వైరాగ్యప్రతిబన్ధాదపి తదననుష్ఠానసమ్భవాత్ భగవతో విశేషవచనాచ్చ న యావజ్జీవం కర్మానుష్ఠానప్రసక్తిః, ఇతి పరిహరతి -
నారురుక్షోరితి ।
ఉక్తమేవార్థం వ్యతిరేకద్వారేణ వివృణోతి -
ఆరురుక్షోరిత్యాదినా ।
ఆరోఢుమ్ ఇచ్ఛతి ఇతి - ఆరురుక్షుః, ఇత్యత్ర ఆరోహణేచ్ఛా విశేషణమ్ , ఆరోహణం కృతవాన్ ఇతి - ఆరూఢః, ఇత్యత్ర పునః ఇచ్ఛావిషయభూతమ్ ఆరోహణం విశేషణమ్ । ఎవం శమకర్మవిషయయోః భేదేన విశేషణం మర్యాదాకరణానఙ్గీకరణే విరుద్ధమ్ ఆపద్యతే । తయోరేవం విభాగకరణం చ భాగవతం సీమానఙ్గీకారే న యుజ్యేత, ఇత్యర్థః ।