మనస్తద్వృత్త్యోః అభావే స్వరూపభూతసుఖావిర్భావస్య స్వాపాదౌ ప్రసిద్ధిం ద్యోతయితుం ‘హి ‘శబ్దః । మోహాదిక్లేశప్రతిబన్ధాత్ యోగిని యథోక్తసుఖాప్రాప్తిమ్ ఆశఙ్క్య, మనోవిలయమ్ ఉపేత్య పరిహరతి -
శాన్తేతి ।
తస్య అస్మదాదివిలక్షణత్వమ్ ఆహ -
బ్రహ్మభూతమితి ।
అస్మదాదేరపి స్వతో బ్రహ్మభూతత్వేన తుల్యం జీవన్ముక్తత్వమ్ , ఇత్యాశఙ్క్య, ఆహ -
బ్రహ్మైవేతి ।
ధర్మాధర్మప్రతిబన్ధాత్ అయుక్తా యథోక్తసుఖప్రప్తిః, ఇత్యాశఙ్క్య ఉక్తమ్ -
అకల్మషమితి
॥ ౨౭ ॥