న కేవలం భగవన్నిష్ఠానాం సర్వాధ్యాత్మికకర్మాత్మకబ్రహ్మవిత్త్వమేవ, కిన్తు అధిభూతాది సహితం తద్వేదిత్వమపి సిధ్యతి, ఇత్యాహ -
సాధిభూతేతి ।
అధ్యాత్మమ్ , కర్మ, అధిభూతమ్ , అధిదైవమ్ , అధియజ్ఞశ్చ ఇతి పఞ్చకమ్ ఎతద్బ్రహ్మ యే విదుః, తేషాం యథోక్తజ్ఞానవతాం సమాహితచేతసామ్ ఆపదవస్థాయామపి భగవత్తత్త్వజ్ఞానమ్ అప్రతిహతం తిష్ఠతి, ఇత్యాహ -
ప్రయాణేతి ।
అపి, చ, ఇతి నిపాతాభ్యామ్ , తస్యామ్ అవస్థాయాం కరణగ్రామస్య వ్యగ్రతయా జ్ఞానాసమ్భవేఽపి మయి సమాహితచిత్తానామ్ ఉక్తజ్ఞానవతాం భగవత్తత్త్వజ్ఞానమ్ అయత్నలభ్యమ్ , ఇతి ద్యోత్యతే । తద్ అనేన సప్తమేన ఉత్తమమ్ అధికారిణం ప్రతి జ్ఞేయం నిరూపయతా తదర్థమేవ సర్వాత్మకత్వాదికమ్ ఉపదిశతా ప్రకృతిద్వయద్వారేణ సర్వకారణత్వాత్ ఇతి చ వదతా తత్పదవాచ్యం తల్లక్ష్యం చ ఉపక్షిప్తమ్ ॥ ౩౦ ॥
ఇతి శ్రీమత్పరమహంస - పరివ్రజకాచార్య - శ్రీమచ్ఛుద్ధానన్దపూజ్యపాదశిష్యానన్దజ్ఞానవిరచితే శ్రీమద్భగవద్గీతాశాఙ్కరభాష్యవ్యాఖ్యానే సప్తమోఽధ్యాయః ॥ ౭ ॥