యోగిన ఇతి ధ్యాయినాం కర్మిణాం చ తన్త్రేణ అభిధానమ్ , ఇత్యాహ -
యోగిన ఇతి ।
కథం కర్మిషు యోగశబ్దో వర్తతామ్ ? , ఇత్యాశఙ్క్య, అనుష్ఠానగుణయోగాత్ ఇత్యాహ-
కర్మిణస్త్వితి ।
గుణతో యోగిన ఇతి సమ్బన్ధః ।
తత్రైవ వాక్యోపక్రమస్య ఆనుకూల్యమ్ ఆహ -
కర్మయోగేనేతి ।
అవశిష్టాని అక్షరాణి వ్యాచక్షాణో వాక్యార్థమ్ ఆహ -
యత్రేతి ।
యోగినో ధ్యాయినోఽత్ర వివక్షితాః, ఆవృతౌ అధికృతా యోగినః కర్మిణ ఇతి విభాగః ।
కాల - ప్రాధాన్యేన మార్గద్వయోపన్యాసమ్ ఉపక్రమ్య తమేవ ప్రధానీకృత్య దేవయానం పన్థానమ్ అవతారయతి -
తం కాలమితి
॥ ౨౩ ॥