ಭಗವನ್ನಿಂದಾಪರಾಣಾಂ ನ ಕಾಚಿದಪಿ ಪ್ರಾರ್ಥನಾ ಅರ್ಥವತೀ, ಇತ್ಯಾಹ -
ವೃಥೇತಿ ।
ನನು ಭಗವಂತಂ ನಿಂದಂತೋಽಪಿ ನಿತ್ಯಂ ನೈಮಿತ್ತಿಕಂ ವಾ ಕರ್ಮ ಅನುತಿಷ್ಠಂತಿ, ತದನುಷ್ಠಾನಾಚ್ಚ ತೇಷಾಂ ಪ್ರಾರ್ಥನಾಃ ಸಾರ್ಥಾ ಭವಿಷ್ಯಂತಿ, ಇತಿ ; ನೇತ್ಯಾಹ -
ತಥೇತಿ ।
ಪರಿಭವಃ - ತಿರಸ್ಕರಣಮ್ , ಅವಜ್ಞಾನಂ - ಅನಾದರಣಮ್ । ತೇಷಾಮಪಿ ಶಾಸ್ತ್ರರ್ಥಜ್ಞಾನವತಾಂ ತದ್ದ್ವಾರಾ ಪ್ರಾರ್ಥನಾರ್ಥವತ್ವಂ, ಇತ್ಯಾಶಂಕ್ಯ, ಆಹ -
ತಥಾ ಮೋಘೇತಿ ।
ತಥಾಪಿ ಯೌಕ್ತಿಕವಿವೇಕವಶಾತ್ ತತ್ಪ್ರಾರ್ಥನಾಸಾಫಲ್ಯಂ, ಇತ್ಯಾಶಂಕ್ಯ, ಆಹ -
ವಿಚೇತಸ ಇತಿ ।
ನ ಕೇವಲಮ್ ಉಕ್ತವಿಶೇಷಣವತ್ವಮೇವ ತೇಷಾಂ, ಕಿಂತು ವರ್ತಮಾನದೇಹಪಾತಾತ್ ಅನಂತರಂ ತತ್ತದತಿಕ್ರೂರಯೋನಿಪ್ರಾಪ್ತಿಶ್ಚ ನಿಶ್ಚಿತಾ, ಇತ್ಯಾಹ -
ಕಿಂಚೇತಿ ।
ಮೋಹಕರೀಂ ಇತಿ ಪ್ರಕೃತಿದ್ವಯೇಽಪಿ ತುಲ್ಯಂ ವಿಶೇಷಣಮ್ , ಛಿಂಧಿ ಭಿಂಧಿ, ಪಿಬ ಖಾದ, ಇತಿ ಪ್ರಾಣಿಹಿಂಸಾರೂಪೋ ರಕ್ಷಸಾಂ ಸ್ವಭಾವಃ, ಅಸುರಾಣಾಂ ಸ್ವಭಾವಸ್ತು ನ ದೇಹಿ, ನ ಜುಹುಧಿ, ಪರಸ್ವಮೇವ ಅಪಹರ, ಇತ್ಯಾದಿರೂಪಃ, ಮೋಹಃ -ಮಿಥ್ಯಾಜ್ಞಾನಮ್ ।
ಉಕ್ತಮೇವ ಸ್ಫುಟಯತಿ -
ಛಿಂಧೀತಿ
॥ ೧೨ ॥