తథేతి మనూనామపి పూర్వత్వేన ఆద్యత్వమ్ అనుకృష్యతే । కే తే మనవః? తత్ర ఆహ-

సావర్ణా ఇతీతి ।

ప్రసిద్ధాః పురాణేషు, ప్రజానాం పాలకాః, స్వయమ్ ఈశ్వరాశ్చ ఇతి శేషః ।

మహర్షీణాం మనూనాం చ తుల్యం విశేషణమ్ -

తే చేతి ।

మయి - సర్వజ్ఞే సర్వేశ్వరే, గతా - భావనా యేషాం, తే తథా । భావనాఫలమ్ ఆహ -

వైష్ణవేనేతి ।

వైష్ణవ్యా శక్త్యా అధిష్ఠితత్వేన జ్ఞానైశ్వర్యవన్తః, ఇత్యర్థః ।

తేషాం జన్మనో వైశిష్ట్యమ్ ఆచష్టే -

మానసా ఇతి ।

మన్వాదీనేవ విశినష్టి-

యేషామితి ।

విద్యయా జన్మనా చ సన్తతిభూతా మన్వాదీనామ్ అస్మిన్ లోకే సర్వాః ప్రజాః, ఇత్యర్థః

॥ ౬ ॥