ನ ಚ ಭೇದವಿಷಯತ್ವಾತ್ ನ ಸಮ್ಯಗ್ಜ್ಞಾನಂ ತದ್ , ಇತಿ ಯುಕ್ತಮ್ , ತಸ್ಯ ವಿವೇಕಜ್ಞಾನಸ್ಯ ವಾಕ್ಯಾರ್ಥಜ್ಞಾನದ್ವಾರಾ ಮೋಕ್ಷೌಪಯಿಕತ್ವೇನ ಸಮ್ಯಕ್ತ್ವಸಿದ್ಧೇಃ ಇತಿ ಭಾವಃ । ಜೀವೇಶ್ವರಯೋಃ ಏಕತ್ವಮುಕ್ತಮ್ ಆಕ್ಷಿಪತಿ -
ನನ್ವಿತಿ ।
ಜೀವೇಶ್ವರಯೋಃ ಏಕತ್ವೇ, ಜೀವಸ್ಯ ಈಶ್ವರೇ ವಾ, ತಸ್ಯ ಜೀವೇ ವಾ, ಅಂತರ್ಭಾವಃ? ನಾದ್ಯಃ, ಜೀವಸ್ಯ ಪರಸ್ಮಾತ್ ಅನ್ಯತ್ವಾಭಾವೇ ಸಂಸಾರಸ್ಯ ನಿರಾಲಂಬನತ್ವಾನುಪಪತ್ತ್ಯಾ ಪರಸ್ಯೈವ ತದಾಶ್ರಯತ್ವಪ್ರಸಂಗಾತ್ ಇತ್ಯರ್ಥಃ ।
‘ಅನಶ್ನನ್ನನ್ಯೋ ಅಭಿಚಾಕಶೀತಿ’ (ಶ್ವೇ. ಉ. ೪-೬) ಇತಿ ಶ್ರುತೇಃ, ನ ತಸ್ಯ ಸಂಸಾರಿತಾ, ಇತ್ಯಾಶಂಕ್ಯ, ದ್ವಿತೀಯಂ ದೂಷಯತಿ -
ಈಶ್ವರೇತಿ ।
ಜೀವೇ ಚೇತ್ ಈಶ್ವರಃ ಅಂತರ್ಭವತಿ, ತದಾಪಿ ತತಃ ಅನ್ಯಸಂಸಾರ್ಯಭಾವಾತ್ ತಸ್ಯ ಚ ಸಂಸಾರಃ ಅನಿಂಷ್ಟಃ, ಇತಿ ಸಂಸಾರಃ ಜಗತಿ ಅಸ್ತಂಗಚ್ಛೇತ್ , ಇತ್ಯರ್ಥಃ ।
ಪ್ರಸಂಗದ್ವಯಸ್ಯ ಇಷ್ಟತ್ವಂ ನಿರಾಚಷ್ಟೇ-
ತಚ್ಚೇತಿ ।
ಸಂಸಾರಾಭಾವೇ ‘ತಯೋರನ್ಯಃ ಪಿಪ್ಪಲಂ ಸ್ವಾದ್ವತ್ತಿ’ (ಶ್ವೇ. ಉ. ೪-೬) ಇತ್ಯಾದಿಬಂಧಶಾಸ್ರಸ್ಯ ತದ್ಧೇತು ಕರ್ಮವಿಷಯಕರ್ಮಕಾಂಡಸ್ಯ ಚ ಆನರ್ಥಕ್ಯಮ್ , ಈಶ್ವರಾಶ್ರಿತೇ ಚ ಸಂಸಾರೇ ತದಭಾಕ್ತೃತ್ವಶ್ರುತೇಃ ಜ್ಞಾನಕಾಂಡಸ್ಯ ಮೋಕ್ಷತದ್ಧೇತುಜ್ಞಾನಾರ್ಥಸ್ಯ ಆನರ್ಥಕ್ಯಮ್ , ಅತೋ ನ ಪ್ರಸಂಗಯೋಃ ಇಷ್ಟತಾ ಇತ್ಯರ್ಥಃ ।
ಸಂಸಾರಾಭಾವಪ್ರಸಂಗಸ್ಯ ಅನಿಷ್ಟತ್ವೇ ಹೇತ್ವಂತರಮ್ ಆಹ -
ಪ್ರತ್ಯಕ್ಷಾದೀತಿ ।
ತತ್ರ ಪ್ರತ್ಯಕ್ಷವಿರೋಧಂ ಪ್ರಕಟಯತಿ -
ಪ್ರತ್ಯಕ್ಷೇಣೇತಿ ।
ಆದಿಶಬ್ದೋಪಾತ್ತಮ್ ಅನುಮಾನವಿರೋಧಮ್ ಆಹ -
ಜಗದಿತಿ ।
ವಿಮತಂ ವಿಚಿತ್ರಹೇತುಕಮ್ , ವಿಚಿತ್ರಕಾರ್ಯತ್ವಾತ್ , ಪ್ರಾಸಾದಾದಿವತ್ , ಇತ್ಯರ್ಥಃ ।
ಪ್ರತ್ಯಕ್ಷಾನುಮಾನಾಗಮವಿರೋಧಾತ್ ಅಯುಕ್ತಮ್ ಐಕ್ಯಮ್ ಇತಿ ಉಪಸಂಹರತಿ-
ಸರ್ವಮಿತಿ ।