ஆரமநோ வஸ்துத: ஸம்ஸாராஸம்ஸ்பர்ஶே வித்³வத³நுப⁴வவிரோத⁴: ஸ்யாத் , இதி, சோத³யதி -
அதே²தி ।
ஏவமிதி - ஆபி⁴ஜாத்யாதி³வைஶிஷ்ட்யம் உக்தம் । இத³மா க்ஷேத்ரகலத்ராதி³ । பண்டி³தாநாமபி ப்ரதீலம் ஸம்ஸாரித்வம் இதி ஶேஷ: ।
கிம் பாண்டி³த்யம் தே³ஹாதௌ³ ஆத்மத³ர்ஶநம் ? கிம் வா கூடஸ்தா²த்மத்³ருஷ்டி:? ஆஹோ ஸம்ஸாரித்வாதி³தீ⁴:? இதி விகல்ப்ய ஆத்³யம் நிராகுர்வந் ஆஹ -
ஶ்ர்ருண்விதி ।
தச்ச வஸ்துத: அஸம்ஸாரித்வாவிரோதி⁴ । ப்ராதிபா⁴ஸிகம் து ஸம்ஸாரித்வம் இஷ்டம் , இதி ஶேஷ: ।
த்³விதீயம் தூ³ஷயதி -
யதீ³தி ।
ந ஹி கூடஸ்தா²த்மவிஷயம் ஸம்ஸாரித்வம் ப்ரதீயதே, யேந வஸ்துத: அஸம்ஸாரித்வாம் விருத்⁴யேத ; கூடஸ்தா²த்மதீ⁴விருத்³தா⁴யா: ஸம்ஸாரித்வபு³த்³தே⁴: அநவகாஶித்வாத் , இத்யர்த²: ।
ஆத்மாநம் அக்ரியம் பஶ்யதோ(அ)பி குதோ போ⁴க³கர்மணீ ந ஸ்யாதாம் ? இத்யாஶங்க்ய, ஆஹ -
விக்ரியேதி ।
அவிக்ரியாத்மபு³த்³தே⁴: போ⁴க³கர்மகாங்க்ஷயோ: அபா⁴வே, கஸ்ய ஶாஸ்த்ரே ப்ரவ்ருத்தி:, இத்யாஶங்க்ய ஆஹ -
அதே²தி ।
ப²லார்தி²த்வாபா⁴வாத் விது³ஷ: ந கர்மணி ப்ரவ்ருத்தி: இத்யேவம் ஸ்தி²தே ஸதி அநந்தரம் அவித்³வாந் ப²லார்தி²த்வாத் தது³பாயே கர்மணி ப்ரவர்த்ததே ஶாஸ்த்ராதி⁴காரீ, இத்யர்த²: ।
விது³ஷ: வைத⁴ப்ரவ்ருத்த்யபா⁴வே(அ)பி நிஷேதா⁴தீ⁴நநிவ்ருத்தேரபி து³ர்வசத்வாத் தஸ்ய நிவ்ருத்திநிஷ்ட²த்வாஸித்³தி⁴:, இத்யாஶங்க்ய, ஆஹ -
விது³ஷ இதி ।