ఆరమనో వస్తుతః సంసారాసంస్పర్శే విద్వదనుభవవిరోధః స్యాత్ , ఇతి, చోదయతి -
అథేతి ।
ఎవమితి - ఆభిజాత్యాదివైశిష్ట్యమ్ ఉక్తమ్ । ఇదమా క్షేత్రకలత్రాది । పణ్డితానామపి ప్రతీలం సంసారిత్వమ్ ఇతి శేషః ।
కిం పాణ్డిత్యం దేహాదౌ ఆత్మదర్శనమ్ ? కిం వా కూటస్థాత్మదృష్టిః? ఆహో సంసారిత్వాదిధీః? ఇతి వికల్ప్య ఆద్యం నిరాకుర్వన్ ఆహ -
శ్రృణ్వితి ।
తచ్చ వస్తుతః అసంసారిత్వావిరోధి । ప్రాతిభాసికం తు సంసారిత్వమ్ ఇష్టమ్ , ఇతి శేషః ।
ద్వితీయం దూషయతి -
యదీతి ।
న హి కూటస్థాత్మవిషయం సంసారిత్వం ప్రతీయతే, యేన వస్తుతః అసంసారిత్వాం విరుధ్యేత ; కూటస్థాత్మధీవిరుద్ధాయాః సంసారిత్వబుద్ధేః అనవకాశిత్వాత్ , ఇత్యర్థః ।
ఆత్మానమ్ అక్రియం పశ్యతోఽపి కుతో భోగకర్మణీ న స్యాతామ్ ? ఇత్యాశఙ్క్య, ఆహ -
విక్రియేతి ।
అవిక్రియాత్మబుద్ధేః భోగకర్మకాఙ్క్షయోః అభావే, కస్య శాస్త్రే ప్రవృత్తిః, ఇత్యాశఙ్క్య ఆహ -
అథేతి ।
ఫలార్థిత్వాభావాత్ విదుషః న కర్మణి ప్రవృత్తిః ఇత్యేవం స్థితే సతి అనన్తరమ్ అవిద్వాన్ ఫలార్థిత్వాత్ తదుపాయే కర్మణి ప్రవర్త్తతే శాస్త్రాధికారీ, ఇత్యర్థః ।
విదుషః వైధప్రవృత్త్యభావేఽపి నిషేధాధీననివృత్తేరపి దుర్వచత్వాత్ తస్య నివృత్తినిష్ఠత్వాసిద్ధిః, ఇత్యాశఙ్క్య, ఆహ -
విదుష ఇతి ।