‘ಸ ಚ ಯೋ ಯತ್ಸ್ವಭಾವಶ್ಚ’ ಇತಿ ಉದ್ದಿಷ್ಟಂ ವ್ಯಾಚಷ್ಟೇ -

ಪ್ರಕೃತಿಮಿತಿ ।

ಈಶ್ವರಸ್ಯ ಅಪರಾ ಪ್ರಕೃತಿಃ ಅತ್ರ ಪ್ರಕೃತಿಶಬ್ದೇನ ಉಕ್ತಾ, ಪರಾ ತು ಪ್ರಕೃತಿಃ ಜೀವಾಖ್ಯಾ ಪುರುಷಶಬ್ದೇನ ವಿವಕ್ಷಿತಾ, ಇತಿ ವ್ಯಾಕರೋತಿ -

ಈಶ್ವರಸ್ಯೇತಿ ।

ತಯೋರನಾದಿತ್ವಂ ವ್ಯುತ್ಪಾದಯತಿ -

ನೇತ್ಯಾದಿನಾ ।

ತತ್ರ ಯುಕ್ತಿಮಾಹ -

ನಿತ್ಯತ್ವಾದೀಶ್ವರಸ್ಯೇತಿ ।

ಈಶ್ವರಸ್ಯ ಉಕ್ತಪ್ರಕೃತಿದ್ವಯವತ್ವಂ ಕಥಮ್ ? ಇತ್ಯಾಶಂಕ್ಯ, ಆಹ -

ಪ್ರಕೃತೀತಿ ।

ತಸ್ಯ ಜಗಜ್ಜನ್ಮಾದೌ ಸ್ವಾತಂತ್ರ್ಯಮೇವ ಈಶ್ವರತ್ವಮ್ , ನ ಪ್ರಕೃತಿದ್ವಯವತ್ವಮ್ , ಇತ್ಯಾಶಂಕ್ಯ, ಆಹ -

ಯಾಭ್ಯಾಮಿತಿ ।

ಪ್ರಕೃತ್ಯೋಃ ಅನಾದಿತ್ವಂ ಕುತ್ರೋಪಯುಕ್ತಮ್ ? ಇತ್ಯಾಶಂಕ್ಯ, ಆಹ -

ತೇ ಇತಿ ।