ಪ್ರಕೃತಸಮ್ಯಗ್ಜ್ಞಾನೇನ ಕಿಮ್ ? ಇತ್ಯಪೇಕ್ಷಾಯಾಂ ತತ್ಫಲೋಕ್ತ್ಯಾ ತಸ್ಯೈವ ಸ್ತುತ್ಯಾ ತದ್ಧೇತೌ ಪುರುಷಂ ಪ್ರವರ್ತಯಿತುಂ ಶ್ಲೋಕಾಂತರಮ್ ಇತ್ಯಾಹ -

ಯಥೋಕ್ತಸ್ಯೇತಿ ।

ಯಸ್ಮಾದಿತ್ಯಸ್ಯ ತತಃಶಬ್ದೇನ ಸಂಬಂಧಃ । ಸರ್ವಭೂತೇಷು ತುಲ್ಯತಯಾವಸ್ಥಿತಂ ಪೂರ್ವೋಕ್ತಲಕ್ಷಣಮೀಶ್ವರಂ ನಿರ್ವಿಶೇಷಂ ಪಶ್ಯನ್ ಆತ್ಮಾನಮಾತ್ಮನಾ ಯಸ್ಮಾತ್ ನ ಹಿನಸ್ತಿ, ತತಃ - ತಸ್ಮಾತ್ , ಮೋಕ್ಷಾಖ್ಯಾಂ ಪರಾಂ ಗತಿಂ ಯಾತಿ, ಇತಿ ಯೋಜನಾ । ತತ್ರ ಪಾದತ್ರಯೇಣ ಜ್ಞಾನಾತ್ ಅಜ್ಞಾನಧ್ವಸ್ತ್ಯಾ ಧ್ವಸ್ತಿರನರ್ಥಸ್ಯ ಉಕ್ತಾ । ಅಜ್ಞಾನಮಿಥ್ಯಾಜ್ಞಾನಯೋಃ ಆವರಣಯೋರ್ನಾಶೇ ಸರ್ವೋತ್ಕೃಷ್ಟಾಂ ಗತಿಂ ಪರಮಪುರುಷಾರ್ಥಂ ಪರಮಾನಂದಮನುಭವತಿ ವಿದ್ವಾನ್ , ಇತಿ ಚತುರ್ಥಪಾದಾರ್ಥಃ ।