ప్రకృతసమ్యగ్జ్ఞానేన కిమ్ ? ఇత్యపేక్షాయాం తత్ఫలోక్త్యా తస్యైవ స్తుత్యా తద్ధేతౌ పురుషం ప్రవర్తయితుం శ్లోకాన్తరమ్ ఇత్యాహ -

యథోక్తస్యేతి ।

యస్మాదిత్యస్య తతఃశబ్దేన సమ్బన్ధః । సర్వభూతేషు తుల్యతయావస్థితం పూర్వోక్తలక్షణమీశ్వరం నిర్విశేషం పశ్యన్ ఆత్మానమాత్మనా యస్మాత్ న హినస్తి, తతః - తస్మాత్ , మోక్షాఖ్యాం పరాం గతిం యాతి, ఇతి యోజనా । తత్ర పాదత్రయేణ జ్ఞానాత్ అజ్ఞానధ్వస్త్యా ధ్వస్తిరనర్థస్య ఉక్తా । అజ్ఞానమిథ్యాజ్ఞానయోః ఆవరణయోర్నాశే సర్వోత్కృష్టాం గతిం పరమపురుషార్థం పరమానన్దమనుభవతి విద్వాన్ , ఇతి చతుర్థపాదార్థః ।