క్షణధ్వంసినః అవ్యయత్వం విరుద్ధమ్ ఇత్యాశఙ్క్య, ఆహ -

సంసారేతి ।

తదేవోపపాదయతి -

అనాదీతి ।

ఛాదనం - రక్షణమ్ , ప్రావరణం వా । కర్మకాణ్డాని ఖలు ఆరోహావరోహఫలాని నానావిధార్థవాదయుక్తాని సంసారవృక్షం రక్షన్తి, తన్నిష్ఠం దోషం చ ఆవృణ్వన్తి । తే తాని ఛన్దాంసి పర్ణానీవ భవన్తి ఇతి అర్థః ।

తదేవ ప్రపఞ్చయతి -

యథేతి ।

ఉక్తేఽర్థే హేతుమాహ -

ధర్మేతి ।

కర్మకాణ్డానాం వేదానాం ఇతి శేషః ।

కర్మబ్రహ్మాఖ్యసర్వవేదార్థస్య తత్ర అన్తర్భావమ్ ఉపేత్య వ్యాచష్టే -

వేదార్థేతి ।

సమూలసంసారవృక్షజ్ఞానే అమూలం హిత్వా మూలమేవ నిష్కృష్య జ్ఞాతుం శక్యమితి తజ్జ్ఞానార్థం ప్రయతితవ్యం ఇతి మత్వా తజ్జ్ఞానస్తుతిః అత్ర వివక్షితా ఇత్యాహ -

న హీతి

॥ ౧ ॥