ವಿರುದ್ಧಾರ್ಥೋಕ್ತ್ಯಾ ಸ್ತುತಿರಪಿ ನ ಯುಕ್ತಾ ಇತಿ ಶಂಕತೇ -
ನನ್ವಿತಿ ।
ವಿರೋಧಂ ಪರಿಹರತಿ -
ನ ಏಷಃ ದೋಷ ಇತಿ ।
ಲೌಕಿಕದೃಷ್ಟಿಮವಷ್ಟಭ್ಯ ಹತ್ವಾಪೀತಿ ನಿರ್ದೇಶಂ ವಿಶದಯತಿ -
ದೇಹಾದೀತಿ ।
ತಾತ್ತ್ವಿಕೀಂ ದೃಷ್ಟಿ ಆಸ್ಥಾಯ ನ ಹಂತಿ ಇತ್ಯಾದಿನಿರ್ದೇಶಮ್ ಉಪಪಾದಯತಿ -
ಯಥೇತಿ ।
ನಾಹಂ ಕರ್ತಾ, ಕಿಂತು ಕರ್ತೃತದ್ವ್ಯಾಪಾರಯೋಃ ಸಾಕ್ಷೀ ಕ್ರಿಯಾಜ್ಞಾನಶಕ್ತಿಮದುಪಾಧಿದ್ವಯವಿನಿರ್ಮುಕ್ತಃ ಶುದ್ಧಃ ಸನ್ ಕಾರ್ಯಕಾರಣಾಸಂಬದ್ಧಃ ಅದ್ವಿತೀಯಃ ಅವಿಕ್ರಿಯಃ ಇತ್ಯೇವಂ ಪಾರಮಾರ್ಥಿಕದೃಷ್ಟೇಃ ಯಥಾದರ್ಶಿತತ್ವಂ ದ್ರಷ್ಟವ್ಯಮ್ ।
‘ಹತ್ವಾಪಿ’ ಇತ್ಯೇತತ್ ‘ನ ಹಂತಿ’ ಇತ್ಯಾದಿ ಚ ಉಭಯಂ ದೃಷ್ಟಿದ್ವಯಾವಷ್ಟಂಭಾತ್ ಉಪಪನ್ನಮ್ ಇತಿ ಉಪಸಂಹರತಿ -
ತದುಭಯಮಿತಿ ।