ఇతశ్చ అసత్కార్యవాదః న యుక్తిమాన్ ఇత్యాహ -

కిఞ్చేతి ।

తదేవ హేత్వన్తరం స్ఫోరయితుం పరమతమ్ అనువదతి -

ఉత్పద్యత ఇతీతి ।

పరకీయం వచనమేవ వ్యాచష్టే -

ప్రాగితి ।

సమ్బద్ధం సత్ ఇతి అనేన కారణసమ్బన్ధే సతి కార్యస్య సత్తాసమ్బన్ధః భవతి ఇతి ఉక్తమ్ ।

తదేవ స్ఫుటయతి -

కారణేతి ।

పరమతమేవ అనుభాష్య దూషయతి -

తత్రేతి ।

కార్యస్య అసతోఽపి కారణం సమ్భవతి ।

తస్య చ కార్యేణ సమ్బన్ధః సిద్ధ్యతి ఇతి ఆశఙ్క్య ఆహ -

న హీతి ।

అసత్త్వాదేవ అసతః సమ్బన్ధాభావే కరణస్య సతోఽపి న తేన సమ్బన్ధః అనుమాతుం శక్యతే ; సదసతోః సమ్బన్ధాభావాత్ ఇత్యర్థః ।