ಆರಂಭವಾದೇ ಪರಿಣಾಮವಾದೇ ಚ  ಉತ್ಪತ್ತ್ಯಾದಿವ್ಯವಹಾರಾನುಪಪತ್ತೌ ಪರಿಶೇಷಾಯಾತಂ ದರ್ಶಯತಿ-

ಪಾರಿಶೇಷ್ಯಾದಿತಿ ।

ಏಕಸ್ಯ ಅನೇಕವಿಧವಿಕಲ್ಪಾನುಪಪತ್ತಿಮ್ ಆಶಂಕ್ಯ, ಆಹ -

ಅವಿದ್ಯಯೇತಿ ।

ಅಸ್ಯಾಪಿ ಮತಸ್ಯ ಭಗವನ್ಮತಾನುರೋಧಿತ್ವಾಭಾವಾತ್ ಅವಿಶಿಷ್ಟಾ ತ್ಯಾಜ್ಯತಾ ಇತಿ ಆಶಂಕ್ಯ ಆಹ -

ಇತೀದಮಿತಿ ।

ಉಕ್ತಮೇವ ಭಗವನ್ಮತಂ ವಿಶದಯತಿ -

ಸತ್ಪ್ರತ್ಯಯಸ್ಯೇತಿ ।

ಸತ್ ಏಕಮೇವ ವಸ್ತು ಸ್ಯಾತ್ ಇತಿ ಶೇಷಃ ।

ಇತರೇಷಾಂ ವಿಕಾರಪ್ರತ್ಯಯಾನಾಂ ರಜತಾದಿಧೀವತ್ ಅರ್ಥವ್ಯಭಿಚಾರಾತ್ , ಅವಿದ್ಯಯಾ ತದೇವ ಸದ್ವಸ್ತು ಅನೇಕಧಾ ವಿಕಲ್ಪ್ಯತೇ ಇತ್ಯಾಹ -

ವ್ಯಭಿಚಾರಾಚ್ಚೇತಿ ।

ಇತಿ ಮತಂ ಶ್ಲೋಕೇ ದರ್ಶಿತಮ್ ಇತಿ ಸಂಬಂಧಃ ।