ఆరమ్భవాదే పరిణామవాదే చ ఉత్పత్త్యాదివ్యవహారానుపపత్తౌ పరిశేషాయాతం దర్శయతి-
పారిశేష్యాదితి ।
ఎకస్య అనేకవిధవికల్పానుపపత్తిమ్ ఆశఙ్క్య, ఆహ -
అవిద్యయేతి ।
అస్యాపి మతస్య భగవన్మతానురోధిత్వాభావాత్ అవిశిష్టా త్యాజ్యతా ఇతి ఆశఙ్క్య ఆహ -
ఇతీదమితి ।
ఉక్తమేవ భగవన్మతం విశదయతి -
సత్ప్రత్యయస్యేతి ।
సత్ ఎకమేవ వస్తు స్యాత్ ఇతి శేషః ।
ఇతరేషాం వికారప్రత్యయానాం రజతాదిధీవత్ అర్థవ్యభిచారాత్ , అవిద్యయా తదేవ సద్వస్తు అనేకధా వికల్ప్యతే ఇత్యాహ -
వ్యభిచారాచ్చేతి ।
ఇతి మతం శ్లోకే దర్శితమ్ ఇతి సమ్బన్ధః ।