ಜ್ಞಾನಸ್ಯ ವಿಷಯಾಕಾರತ್ವಾತ್ , ಆತ್ಮನಶ್ಚ ಅವಿಷಯತ್ವಾತ್ ಅನಾಕಾರತ್ವಾಚ್ಚ ತದಾಕಾರಜ್ಞಾನಾಯೋಗಾತ್ , ಆತ್ಮಪ್ರಸಿದ್ಧಾವಪಿ ನ ಆತ್ಮಜ್ಞಾನಪ್ರಸಿದ್ಧಿಃ ಇತಿ ಶಂಕತೇ -
ನನ್ವಿತಿ ।
ಆಕಾರವತ್ತ್ವಮ್ ಆತ್ಮನಃ ಶ್ರುತಿಸಿದ್ಧಮ್ ಇತಿ ಸಿದ್ಧಾಂತೀ ಶಂಕತೇ-
ನನ್ವಾದಿತ್ಯೇತಿ ।
ಉಕ್ತವಾಕ್ಯಾನಾಮ್ ಅನ್ಯಾರ್ಥತ್ವದರ್ಶನೇನ ಪೂರ್ವವಾದೀ ಪರಿಹರತಿ -
ನೇತ್ಯಾದಿನಾ ।
ಸಂಗ್ರಹವಾಕ್ಯಂ ಪ್ರಪಂಚಯತಿ -
ದ್ರವ್ಯೇತಿ ।
ಇತಶ್ಚ ಆಕಾರವತ್ತ್ವಮ್ ಆತ್ಮನಃ ನಾಸ್ತಿ ಇತಿ ಆಹ-
ಅರೂಪಮಿತಿ ।
ಯತ್ ಆತ್ಮನಃ ವಿಷಯತ್ವಾಭಾವಾತ್ ತದ್ವಿಷಯಂ ಜ್ಞಾನಂ ನ ಸಂಭವತಿ ಇತಿ ಉಕ್ತಂ ತತ್ ಉಪಪಾದಯತಿ-
ಅವಿಷಯತ್ವಾಚ್ಚೇತಿ ।
ಆತ್ಮನಃ ಅವಿಷಯತ್ವೇ ಶ್ರುತಿಮ್ ಉದಾಹರತಿ -
ನೇತ್ಯಾದಿನಾ ।
ಸಂದೃಶೇ - ಸಮ್ಯಗ್ದರ್ಶನವಿಷಯತ್ವಾಯ, ಅಸ್ಯ - ಆತ್ಮನಃ, ರೂಪಂ ನ ತಿಷ್ಠತಿ ಇತ್ಯರ್ಥಃ ।
ತದೇವ ಕರಣಾಗೋಚರತ್ವೇನ ಉಪಪಾದಯತಿ -
ನೇತಿ ।
ಶಬ್ದಾದಿಶೂನ್ಯತ್ವಾಚ್ಚ ಆತ್ಮಾ ವಿಷಯಃ ನ ಭವತಿ, ಇತ್ಯಾಹ -
ಅಶಬ್ದಮಿತಿ ।
ಆತ್ಮನಃ ವಿಷಯತ್ವಾಕಾರವತ್ತ್ವಯೋಃ ಅಭಾವೇ ಫಲಿತಮ್ ಆಹ -
ತಸ್ಮಾದಿತಿ ।