ಚಿಕೀರ್ಷಿತಂ ಪ್ರತಿಜಾನೀತಿ -
ಕಾಠಕೇತಿ ।
ನನೂಪನಿಷದೋ ವೃತ್ತಿರ್ನಾಽಽರಬ್ಧವ್ಯಾ ಪ್ರಾಣಿನಾಂ ಕಾಮಕಲುಷಿತಚೇತಸಾಮುಪನಿಷಚ್ಛ್ರವಣಾತ್ಪರಾಙ್ಮುಖತ್ವಾದ್ವಿಶಿಷ್ಟಸ್ಯಾಧಿಕಾರಿಣೋ ದುರ್ನಿರೂಪತ್ವಾದ್ಬಂಧಸ್ಯ ಚ ಸತ್ಯಸ್ಯ ಕರ್ಮಭ್ಯ ಏವ ನಿವೃತ್ತೇರುಪನಿಷಜ್ಜನ್ಯವಿದ್ಯಾಯಾ ನಿಷ್ಪ್ರಯೋಜನತ್ವಾಜ್ಜೀವಸ್ಯ ಚಾಸಂಸಾರಿಬ್ರಹ್ಮಾತ್ಮತಾಯಾಃ ಪ್ರತಿಪಾದಯಿತುಮಶಕ್ಯತ್ವೇನ ನಿರ್ವಿಷಯತ್ವಾಚ್ಚೇತ್ಯಾಶಂಕ್ಯೋಪನಿಷಚ್ಛಬ್ದನಿರ್ವಚನೇನ ವಿದ್ಯಾಯಾ ವಿಶಿಷ್ಟಾಧಿಕಾರ್ಯಾದಿಮತ್ತ್ವಪ್ರದರ್ಶನೇನ ತಜ್ಜನಕಸ್ಯ ಗ್ರಂಥಸ್ಯಾಪಿ ವಿಶಿಷ್ಟಾಧಿಕಾರ್ಯಾದಿಮತ್ತ್ವೇನ ವ್ಯಾಖ್ಯೇಯತ್ವಂ ದರ್ಶಯಿತುಂ ಪ್ರಥಮಮುಪನಿಷಚ್ಛಬ್ದಸ್ವರೂಪಸಿದ್ಧಿಂ ತಾವದಾಹ -
ಉಪನಿಪೂರ್ವಸ್ಯೇತಿ ।
ಬ್ರಹ್ಮವಿದ್ಯಾಯಾಮುಪನಿಷಚ್ಛಬ್ದಸ್ಯ ‘ಉಪನಿಷದಂ ಭೋ ಬ್ರೂಹಿ’(ಕೇ.ಉ. ೪-೭) ಇತ್ಯಾದಿಪ್ರಯೋಗದರ್ಶನಾದ್ಧಾತ್ವರ್ಥಮಾಹ -
ಉಪನಿಷಚ್ಛಬ್ದೇನೇತಿ ।
ಕ್ಲೃಪ್ತಾವಯವಶಕ್ತ್ಯೈವ ಪ್ರಯೋಗಸಂಭವೇ ಸಮುದಾಯಶಕ್ತಿರುಪನಿಷಚ್ಛಬ್ದಸ್ಯ ನ ಕಲ್ಪನೀಯೇತ್ಯಾಹ -
ಕೇನ ಪುನರಿತಿ ।
‘ಷದ್ಲೃ’ ವಿಶರಣಗತ್ಯವಸಾದನೇಷ್ವಿತಿ ಧಾತೋರ್ವಿಶರಣಮರ್ಥಮಾದಾಯ ಯೋಗವೃತ್ತಿಮಾಹ -
ಉಚ್ಯತ ಇತಿ ।
ವಿಷಯೇಷು ಕ್ಷಯಿಷ್ಣುತ್ವಾದಿದೋಷದರ್ಶನಾದ್ವಿರಕ್ತಾಃ ಕೇಚನ ಮುಮುಕ್ಷವಃ ಪ್ರಸಿದ್ಧಾ ನ ಸರ್ವೇ ಭವದೃಶಾಃ ಕಾಮುಕಾ ಏವೇತಿ ಯಚ್ಛಬ್ದೇನ ಪ್ರಸಿದ್ಧಾವದ್ಯೋತಕೇನ ಕಥಯತಿ । ಆನುಶ್ರವಿಕಾಃ ಶಬ್ದಪ್ರತಿಪನ್ನಾಃ ಸ್ವರ್ಗಭೋಗಾದಯಃ ।
ಉಪಸದ್ಯೇತಿ ।
ಆಚಾರ್ಯೋಪದೇಶಾಲ್ಲಬ್ಧ್ವಾ ಯಾವತ್ಸಾಕ್ಷಾತ್ಕಾರಂ ಶೀಲಯಂತಿ ಸಂಸಾರ್ಯಸಂಸಾರ್ಯೈಕ್ಯಾಸಂಭಾವನಾದಿ ನಿರಸ್ಯಂತೀತ್ಯರ್ಥಃ ।
ಗತ್ಯರ್ಥಮಾದಾಯಾಽಽಹ -
ಪೂರ್ವೋಕ್ತೇತಿ ।
ಅಗ್ನಿವಿದ್ಯಾಯಾಮಪ್ಯವಸಾದನಮಾದಾಯೋಪನಿಷಚ್ಛಬ್ದಸ್ಯ ವೃತ್ತಿಮಾಹ -
ಲೋಕಾದಿರಿತಿ ।
ಭೂರಾದಿಲೋಕಾನಾಮಾದಿಃ ಪ್ರಥಮಜೋ ಬ್ರಹ್ಮಣೋ ಜಾತೋ ಬ್ರಹ್ಮಜಃ ಸ ಏವ ಜಾನಾತೀತಿ ಜ್ಞಃ ।
ಗ್ರಂಥೇ ತು ಭಕ್ತ್ಯೇತಿ ।
ಉಪಚಾರೇಣೋಪನಿಷಚ್ಛಬ್ದಪ್ರಯೋಗ ಇತ್ಯರ್ಥಃ ।
ಉಪನಿಷಚ್ಛಬ್ದನಿರ್ವಚನೇನ ಸಿದ್ಧಮರ್ಥಮಾಹ -
ಏವಮಿತ್ಯಾದಿನಾ ।
ಆತ್ಯಂತಿಕೀ ನಿದಾನನಿವೃತ್ತ್ಯಾ ನಿವೃತ್ತಿರ್ವಿವಕ್ಷಿತಾ । ನಿದಾನಂ ಚಾನ್ವಯವ್ಯತಿರೇಕಶಾಸ್ತ್ರನ್ಯಾಯೇಭ್ಯಃ ಸಂಸಾರಸ್ಯಾಽಽತ್ಮೈಕತ್ವಾವಿದ್ಯಾ । ಸಾ ಚ ನ ಕರ್ಮಣಾ ವಿನಿವರ್ತತೇಽತೋ ವಿದ್ಯಾಯಾಃ ಪ್ರಯೋಜನೇನ ಸಾಧ್ಯಸಾಧನಲಕ್ಷಣಃ ಸಂಬಂಧ ಇತ್ಯರ್ಥಃ । ‘ವಶ’ ಕಾಂತಾವಿತ್ಯಸ್ಯ ಶತ್ರಂತಂ ರೂಪಮುಶನ್ನಿತಿ । ಶ್ರವಃ ಕೀರ್ತಿಃ । ಸರ್ವಮೇಧೇನ ಸರ್ವಸ್ವದಕ್ಷಿಣೇನೇಜೇ ಯಜನಂ ಕೃತವಾನಿತ್ಯರ್ಥಃ ॥ ೧ ॥