శాన్తసఙ్కల్పః సుమనా యథా స్యాద్వీతమన్యుర్గౌతమో మాభిమృత్యో ।
త్వత్ప్రసృష్టం మాభివదేత్ప్రతీత ఎతత్త్రయాణాం ప్రథమం వరం వృణే ॥ ౧౦ ॥
నచికేతాస్త్వాహ — యది దిత్సుర్వరాన్ , శాన్తసఙ్కల్పః ఉపశాన్తః సఙ్కల్పో యస్య మాం ప్రతి ‘యమం ప్రాప్య కిం ను కరిష్యతి మమ పుత్రః’ ఇతి, సః శాన్తసఙ్కల్పః సుమనాః ప్రసన్నచిత్తశ్చ యథా స్యాత్ వీతమన్యుః విగతరోషశ్చ గౌతమః మమ పితా మా అభి మాం ప్రతి హే మృత్యో ; కిఞ్చ, త్వత్ప్రసృష్టం త్వయా వినిర్ముక్తం ప్రేషితం గృహం ప్రతి మా మామ్ అభివదేత్ ప్రతీతః లబ్ధస్మృతిః, ‘స ఎవాయం పుత్రో మమాగతః’ ఇత్యేవం ప్రత్యభిజానన్నిత్యర్థః । ఎతత్ప్రయోజనం త్రయాణాం వరాణాం ప్రథమమ్ ఆద్యం వరం వృణే ప్రార్థయే యత్పితుః పరితోషణమ్ ॥