పునరపి కర్మస్తుతిమేవాహ — త్రిణాచికేతః త్రిః కృత్వా నాచికేతోఽగ్నిశ్చితో యేన సః త్రిణాచికేతః ; తద్విజ్ఞానవాన్వా । త్రిభిః మాతృపిత్రాచార్యైః ఎత్య ప్రాప్య సన్ధిం సన్ధానం సమ్బన్ధమ్ , మాత్రాద్యనుశాసనం యథావత్ప్రాప్యేత్యేతత్ । తద్ధి ప్రామాణ్యకారణం శ్రుత్యన్తరాదవగమ్యతే ‘యథా మాతృమాన్పితృమాన్’ (బృ. ఉ. ౪ । ౧ । ౨) ఇత్యాదేః । వేదస్మృతిశిష్టైర్వా ప్రత్యక్షానుమానాగమైర్వా । తేభ్యో హి విశుద్ధిః ప్రత్యక్షా । త్రికర్మకృత్ ఇజ్యాధ్యయనదానానాం కర్తా తరతి అతిక్రామతి జన్మమృత్యూ । కిఞ్చ, బ్రహ్మజజ్ఞమ్ , బ్రహ్మణో హిరణ్యగర్భాజ్జాతో బ్రహ్మజః బ్రహ్మజశ్చాసౌ జ్ఞశ్చేతి బ్రహ్మజజ్ఞః । సర్వజ్ఞో హ్యసౌ । తం దేవం ద్యోతనాజ్జ్ఞానాదిగుణవన్తమ్ , ఈడ్యం స్తుత్యం విదిత్వా శాస్త్రతః, నిచాయ్య దృష్ట్వా చాత్మభావేన ఇమాం స్వబుద్ధిప్రత్యక్షాం శాన్తిమ్ ఉపరతిమ్ అత్యన్తమ్ ఎతి అతిశయేనైతి । వైరాజం పదం జ్ఞానకర్మసముచ్చయానుష్ఠానేన ప్రాప్నోతీత్యర్థః ॥