ఎవం భూతమప్యాత్మానం శరీరమాత్రాత్మదృష్టిః హన్తా చేత్ యది మన్యతే చిన్తయతి ఇచ్ఛతి హన్తుం హనిష్యామ్యేనమితి యోఽప్యన్యో హతః సోఽపి చేన్మన్యతే హతమాత్మానం హతోఽహమితి ఉభావపి తౌ న విజానీతః స్వమాత్మానమ్ ; యతః నాయం హన్తి అవిక్రియత్వాదాత్మనః, తథా న హన్యతే ఆకాశవదవిక్రియత్వాదేవ । అతోఽనాత్మజ్ఞవిషయ ఎవ ధర్మాధర్మాదిలక్షణః సంసారః నాత్మజ్ఞస్య, శ్రుతిప్రామాణ్యాన్న్యాయాచ్చ ధర్మాధర్మాద్యనుపపత్తేః ॥