అనుమానప్రయుక్తాం తురీయేఽపి కారణబద్ధత్వాశఙ్కాం పరిహరతి –
ద్వైతస్యేతి ।
శ్లోకస్య తాత్పర్యం గృహ్ణాతి –
నిమిత్తాన్తరేతి ।
విమతం కారణబద్ధం ద్వైతాగ్రహణవత్త్వాత్ ప్రాజ్ఞవదిత్యనుమానమేవ దర్శయన్నిమిత్తాన్తరమేవ స్ఫోరయతి –
కథమితి ।
అనుమానకృతాశఙ్కానివర్తకత్వేన శ్లోకమవతారయతి –
ప్రాప్తేతి ।
ప్రాజ్ఞస్యోత్తరభావిప్రబోధాదికార్యాపేక్షయా నియతపూర్వభావిత్వం కారణబద్ధత్వప్రయోజకమ్ ।
న చ తురీయస్య తదస్తీత్యప్రయోజకో హేతురిత్యాహ –
యస్మాదితి ।
కిం చ తురీయస్య విశుద్ధచిద్ధాతుత్వప్రసాధనప్రమాణబాధాత్ కాలాత్యయాపదిష్టో హేతురిత్యాహ –
సదేతి ।
న చ పూర్వోక్తోపాధేః సాధనవ్యాప్తిస్తురీయస్యోత్తరభావికార్యాపేక్షయా నియతప్రాగ్భావిత్వాభావాదితి మత్వాఽఽహ –
తత్త్వేతి ।
దోషద్వయవత్త్వేనానుమానస్యామానత్వే ఫలితమాహ –
అతో నేతి ॥౧౩॥