ಕದಾ ತತ್ತ್ವಪ್ರತಿಬೋಧೋ ವಿಪರ್ಯಾಸಕ್ಷಯಹೇತುರ್ಭವತೀತ್ಯಪೇಕ್ಷಾಯಾಮಾಹ –

ಅನಾದೀತಿ ।

ಪ್ರತಿಬುದ್ಧ್ಯಮಾನಂ ತತ್ತ್ವಮೇವ ವಿಶಿನಷ್ಟಿ –

ಅಜಮಿತಿ ।

ಜೀವಶಬ್ದವಾಚ್ಯಮರ್ಥಂ ನಿರ್ದಿಶತಿ –

ಯೋಽಯಮಿತಿ ।

ಪರಮಾತ್ಮೈವ ಜೀವಭಾವಮಾಪನ್ನಃ ಸಂಸರತೀತ್ಯರ್ಥಃ ।

ತಸ್ಯ ಕಥಂ ಜೀವಭಾವಾಪತ್ತಿರಿತ್ಯಾಶಂಕ್ಯ ಕಾರ್ಯಕರಣಬದ್ಧತ್ವಾದಿತ್ಯಾಹ –

ಸ ಇತಿ ।

ಪರಮಾತ್ಮೋಭಯಲಕ್ಷಣೇನ ಸ್ವಾಪೇನ ಸುಪ್ತೋ ಜೀವೋ ಭವತೀತ್ಯನ್ವಯಃ।

ಸ್ವಾಪಸ್ಯೋಭಯಲಕ್ಷಣತ್ವಮೇವ ಪ್ರಕಟಯತಿ –

ತತ್ತ್ವೇತ್ಯಾದಿನಾ ।

ಮಾಯಾಲಕ್ಷಣೇನೇತ್ಯುಭಯತ್ರ ಸಂಬಧ್ಯತೇ ।

ಸುಪ್ತಮೇವ ವ್ಯನಕ್ತಿ –

ಮಮೇತ್ಯಾದಿನಾ ।

ಸ್ವಾಪಪರಿಗೃಹೀತಸ್ಯೈವ ಪ್ರತಿಬೋಧನಾವಕಾಶೋ ಭವತೀತ್ಯಾಹ –

ಯದೇತಿ ।

ಯದಾ ಸುಷುಪ್ತಸ್ತದಾ ಬುಧ್ಯತ ಇತಿ ಶೇಷಃ ।

ಪ್ರತಿಬೋಧಕಂ ವಿಶಿನಷ್ಟಿ –

ವೇದಾಂತಾರ್ಥೇತಿ ।

ಕಥಂ ಪ್ರತಿಬೋಧನಂ, ತದಾಹ –

ನಾಸೀತಿ ।

ಅನುಭೂಯಮಾನತ್ವಮೇವಮಿತ್ಯುಚ್ಯತೇ । ಯದೋಕ್ತವಿಶೇಷಣೇನ ಗುರುಣಾ ಪ್ರತಿಬೋಧ್ಯಮಾನಃ ಶಿಷ್ಯಸ್ತದಾಽಸಾವೇವಂ ವಕ್ಷ್ಯಮಾಣಪ್ರಕಾರೇಣ ಪ್ರತಿಬುದ್ಧೋ ಭವತೀತ್ಯುಕ್ತಮ್ ।

ತಮೇವ ಪ್ರಕಾರಂ ಪ್ರಶ್ನಪೂರ್ವಕಂ ದ್ವಿತೀಯಾರ್ಧವ್ಯಾಖ್ಯಾನೇನ ವಿಶದಯತಿ –

ಕಥಮಿತ್ಯಾದಿನಾ ।

ಅಸ್ಮಿನ್ನಿತಿ ಸಪ್ತಮ್ಯಾ ಬೋಧ್ಯಾತ್ಮರೂಪಂ ಪರಾಮೃಶ್ಯತೇ । ಬಾಹ್ಯಂ ಕಾರ್ಯಮಾಂತರಂ ಕಾರಣಂ ತಚ್ಚೋಭಯಮಿಹ ನಾಸ್ತಿ । ತತೋ ಜನ್ಮಾದೇರ್ಭಾವವಿಕಾರಸ್ಯ ನಾತ್ರಾವಕಾಶಃ ಸಂಭವತೀತ್ಯರ್ಥಃ ।

ಅವತಾರಿತಂ ವಿಶೇಷಣಂ ಸಪ್ರಮಾಣಂ ಯೋಜಯತಿ –

ಸಬಾಹ್ಯೇತಿ ।

ಅಜತ್ವಾದೇವಾನಿದ್ರಂ ಕಾರ್ಯಾಭಾವೇ ಕಾರಣಸ್ಯ ಪ್ರಮಾಣಾಭಾವೇನ ವಕ್ತುಮಶಕ್ಯತ್ವಾದಿತಿ ಮತ್ವಾಽಽಹ –

ಯಸ್ಮಾದಿತಿ ।

ಅನಿದ್ರತ್ವಂ ಹೇತುಂ ಕೃತ್ವಾ ವಿಶೇಷಣಾಂತರಂ ದರ್ಶಯತಿ –

ಅತ ಏವೇತಿ ।

ಅಗ್ರಹಣಾನ್ಯಥಾಗ್ರಹಣಸಂಬಂಧವೈಧುರ್ಯಂ ಹೇತುಂ ಕೃತ್ವಾ ವಿಶೇಷಣದ್ವಯಮಿತ್ಯಾಹ –

ಯಸ್ಮಾಚ್ಚೇತಿ ।

ತತ್ತ್ವಮೇವಂಲಕ್ಷಣಮಸ್ತು, ಆತ್ಮನಃ ಕಿಮಾಯಾತಮಿತ್ಯಾಶಂಕ್ಯಾಽಽಹ –

??

ತದಾ ವಿಶಿಷ್ಟೇನಾಽಽಚಾರ್ಯೇಣ ವಿಶಿಷ್ಟಂ ಶಿಷ್ಯಂ ಪ್ರತಿ ಬೋಧನಾವಸ್ಥಾಯಾಮಿತ್ಯರ್ಥಃ ॥೧೬॥