బ్రహ్మబుద్ధ్యా ప్రణవమభిధ్యాయతో హృదయాఖ్యం దేశముపదిశతి –
ప్రణవమితి ।
పరమార్థదర్శినస్తు దేశాద్యనవచ్ఛిన్నవస్తుదర్శనాదార్థికం శోకాభావం ‘తత్ర కో మోహః కః శోక’ (ఈ. ఉ. ౭) ఇత్యాదిశ్రుతిసిద్ధమనువదతి –
సర్వవ్యాపినమితి ।
హృదయదేశే ప్రణవభూతస్య బ్రహ్మణో ధ్యేయత్వే హేతుం సూచయతి –
స్మృతిప్రత్యయేతి ।
బుద్ధిమానితి వివేకిత్వముచ్యతే। మత్వేతి సాక్షాత్కారసమ్పత్తిర్వివక్ష్యతే ।
వివేకద్వారా తత్త్వసాక్షాత్కారే సతి శోకనివృత్తౌ హేతుమాహ –
శోకేతి ।
తస్య హి నిమిత్తమాత్మాజ్ఞానమ్ ।
తస్యాఽఽత్మసాక్షాత్కారతో నివృత్తౌ శోకానుపపత్తిరిత్యత్ర ప్రమాణమాహ –
తరతీతి ।
ఆదిశబ్దేన ‘భిద్యతే హృదయగ్రన్థిః’ (ము. ఉ. ౨ । ౨ । ౯) ఇత్యాదిశ్రుతిర్గృహ్యతే ॥౨౮॥