శౌనకః శునకస్యాపత్యం మహాశాలః మహాగృహస్థః అఙ్గిరసం భారద్వాజశిష్యమాచార్యం విధివత్ యథాశాస్త్రమిత్యేతత్ ; ఉపసన్నః ఉపగతః సన్ పప్రచ్ఛ పృష్టవాన్ । శౌనకాఙ్గిరసోః సమ్బన్ధాదర్వాగ్విధివద్విశేషణాభావాదుపసదనవిధేః పూర్వేషామనియమ ఇతి గమ్యతే । మర్యాదాకరణార్థం విశేషణమ్ । మధ్యదీపికాన్యాయార్థం వా విశేషణమ్ , అస్మదాదిష్వప్యుపసదనవిధేరిష్టత్వాత్ । కిమిత్యాహ — కస్మిన్ను భగవో విజ్ఞాతే, ను ఇతి వితర్కే, భగవః హే భగవన్ , సర్వం యదిదం విజ్ఞేయం విజ్ఞాతం విశేషేణ జ్ఞాతమవగతం భవతీతి ‘ఎకస్మిన్విజ్ఞాతే సర్వవిద్భవతి’ ఇతి శిష్టప్రవాదం శ్రుతవాఞ్శౌనకః తద్విశేషం విజ్ఞాతుకామః సన్కస్మిన్నితి వితర్కయన్పప్రచ్ఛ । అథవా, లోకసామాన్యదృష్ట్యా జ్ఞాత్వైవ పప్రచ్ఛ । సన్తి హి లోకే సువర్ణాదిశకలభేదాః సువర్ణత్వాద్యేకత్వవిజ్ఞానేన విజ్ఞాయమానా లౌకికైః ; తథా కిం న్వస్తి సర్వస్య జగద్భేదస్యైకం కారణమ్ యత్రైకస్మిన్విజ్ఞాతే సర్వం విజ్ఞాతం భవతీతి । నన్వవిదితే హి కస్మిన్నితి ప్రశ్నోఽనుపపన్నః ; కిమస్తి తదితి తదా ప్రశ్నో యుక్తః ; సిద్ధే హ్యస్తిత్వే కస్మిన్నితి స్యాత్ , యథా కస్మిన్నిధేయమితి । న ; అక్షరబాహుల్యాదాయాసభీరుత్వాత్ప్రశ్నః సమ్భవత్యేవ — కిం న్వస్తి తద్యస్మిన్నేకస్మిన్విజ్ఞాతే సర్వవిత్స్యాదితి ॥