తత్ర కా అపరేత్యుచ్యతే — ఋగ్వేదో యజుర్వేదః సామవేదోఽథర్వవేదః ఇత్యేతే చత్వారో వేదాః । శిక్షా కల్పో వ్యాకరణం నిరుక్తం ఛన్దో జ్యోతిషమ్ ఇత్యఙ్గాని షట్ ; ఎషా అపరా విద్యోక్తా । అథ ఇదానీమ్ ఇయం పరా విద్యోచ్యతే యయా తత్ వక్ష్యమాణవిశేషణమ్ అక్షరమ్ అధిగమ్యతే ప్రాప్యతే, అధిపూర్వస్య గమేః ప్రాయశః ప్రాప్త్యర్థత్వాత్ ; న చ పరప్రాప్తేరవగమార్థస్య చ భేదోఽస్తి ; అవిద్యాయా అపాయ ఎవ హి పరప్రాప్తిర్నార్థాన్తరమ్ । నను ఋగ్వేదాదిబాహ్యా తర్హి సా కథం పరా విద్యా స్యాత్ మోక్షసాధనం చ । ‘యా వేదబాహ్యాః స్మృతయో యాశ్చ కాశ్చ కుదృష్టయః. . . ’ (మను. ౧౨ । ౯౫) ఇతి హి స్మరన్తి । కుదృష్టిత్వాన్నిష్ఫలత్వాదనాదేయా స్యాత్ ; ఉపనిషదాం చ ఋగ్వేదాదిబాహ్యత్వం స్యాత్ । ఋగ్వేదాదిత్వే తు పృథక్కరణమనర్థకమ్ అథ పరేతి । న, వేద్యవిషయవిజ్ఞానస్య వివక్షితత్వాత్ । ఉపనిషద్వేద్యాక్షరవిషయం హి విజ్ఞానమిహ పరా విద్యేతి ప్రాధాన్యేన వివక్షితమ్ , నోపనిషచ్ఛబ్దరాశిః । వేదశబ్దేన తు సర్వత్ర శబ్దరాశిర్వివక్షితః । శబ్దరాశ్యధిగమేఽపి యత్నాన్తరమన్తరేణ గుర్వభిగమనాదిలక్షణం వైరాగ్యం చ నాక్షరాధిగమః సమ్భవతీతి పృథక్కరణం బ్రహ్మవిద్యాయా అథ పరా విద్యేతి ॥