భూతయోనిరక్షరమిత్యుక్తమ్ । తత్కథం భూతయోనిత్వమిత్యుచ్యతే దృష్టాన్తైః — యథా లోకే ప్రసిద్ధః ఊర్ణనాభిః లూతాకీటః కిఞ్చిత్కారణాన్తరమనపేక్ష్య స్వయమేవ సృజతే స్వశరీరావ్యతిరిక్తానేవ తన్తూన్బహిః ప్రసారయతి పునస్తానేవ గృహ్ణతే చ గృహ్ణాతి స్వాత్మభావమేవాపాదయతి ; యథా చ పృథివ్యామ్ ఓషధయః, వ్రీహ్యాదిస్థావరాణీత్యర్థః, స్వాత్మావ్యతిరిక్తా ఎవ ప్రభవన్తి సమ్భవన్తి ; యథా చ సతః విద్యమానాజ్జీవతః పురుషాత్ కేశలోమాని కేశాశ్చ లోమాని చ సమ్భవన్తి విలక్షణాని । యథైతే దృష్టాన్తాః, తథా విలక్షణం సలక్షణం చ నిమిత్తాన్తరానపేక్షాద్యథోక్తలక్షణాత్ అక్షరాత్ సమ్భవతి సముత్పద్యతే ఇహ సంసారమణ్డలే విశ్వం సమస్తం జగత్ । అనేకదృష్టాన్తోపాదానం తు సుఖావబోధనార్థమ్ ॥