ತಾನ್ ಏವಮುಪಗತಾನ್ ಸಃ ಹ ಕಿಲ ಋಷಿಃ ಉವಾಚ ಭೂಯಃ ಪುನರೇವ — ಯದ್ಯಪಿ ಯೂಯಂ ಪೂರ್ವಂ ತಪಸ್ವಿನ ಏವ, ತಥಾಪೀಹ ತಪಸಾ ಇಂದ್ರಿಯಸಂಯಮೇನ ವಿಶೇಷತೋ ಬ್ರಹ್ಮಚರ್ಯೇಣ ಶ್ರದ್ಧಯಾ ಚ ಆಸ್ತಿಕ್ಯಬುದ್ಧ್ಯಾ ಆದರವಂತಃ ಸಂವತ್ಸರಂ ಕಾಲಂ ಸಂವತ್ಸ್ಯಥ ಸಮ್ಯಗ್ಗುರುಶುಶ್ರೂಷಾಪರಾಃ ಸಂತೋ ವತ್ಸ್ಯಥ । ತತಃ ಯಥಾಕಾಮಂ ಯೋ ಯಸ್ಯ ಕಾಮಸ್ತಮನತಿಕ್ರಮ್ಯ ಯದ್ವಿಷಯೇ ಯಸ್ಯ ಜಿಜ್ಞಾಸಾ ತದ್ವಿಷಯಾನ್ ಪ್ರಶ್ನಾನ್ ಪೃಚ್ಛತ । ಯದಿ ತದ್ಯುಷ್ಮತ್ಪೃಷ್ಟಂ ವಿಜ್ಞಾಸ್ಯಾಮಃ । ಅನುದ್ಧತತ್ವಪ್ರದರ್ಶನಾರ್ಥೋ ಯದಿ - ಶಬ್ದೋ ನಾಜ್ಞಾನಸಂಶಯಾರ್ಥಃ ಪ್ರಶ್ನನಿರ್ಣಯಾದವಸೀಯತೇ ಸರ್ವಂ ಹ ವೋ ವಃ ಪೃಷ್ಟಾರ್ಥಂ ವಕ್ಷ್ಯಾಮ ಇತಿ ॥