అహోరాత్రో వై ప్రజాపతిస్తస్యాహరేవ ప్రాణో రాత్రిరేవ రయిః ప్రాణం వా ఎతే ప్రస్కన్దన్తి యే దివా రత్యా సంయుజ్యన్తే బ్రహ్మచర్యమేవ తద్యద్రాత్రౌ రత్యా సంయుజ్యన్తే ॥ ౧౩ ॥
సోఽపి మాసాత్మా ప్రజాపతిః స్వావయవే అహోరాత్రే పరిసమాప్యతే । అహోరాత్రో వై ప్రజాపతిః పూర్వవత్ । తస్యాపి అహరేవ ప్రాణః అత్తా అగ్నిః రాత్రిరేవ రయిః పూర్వవదేవ । ప్రాణమ్ అహరాత్మానం వై ఎతే ప్రస్కన్దన్తి నిర్గమయన్తి శోషయన్తి వా స్వాత్మనో విచ్ఛిద్యాపనయన్తి । కే ? యే దివా అహని రత్యా రతికారణభూతయా సహ స్త్రియా సంయుజ్యన్తే మైథునమాచరన్తి మూఢాః । యత ఎవం తస్మాత్తన్న కర్తవ్యమితి ప్రతిషేధః ప్రాసఙ్గికః । యత్ రాత్రౌ సంయుజ్యన్తే రత్యా ఋతౌ బ్రహ్మచర్యమేవ తదితి ప్రశస్తత్వాత్ రాత్రౌ భార్యాగమనం కర్తవ్యమిత్యయమపి ప్రాసఙ్గికో విధిః ॥