ತತ್ ತತ್ರೈವಂ ಸತಿ ಯೇ ಗೃಹಸ್ಥಾಃ । ಹ ವೈ ಇತಿ ಪ್ರಸಿದ್ಧಸ್ಮರಣಾರ್ಥೌ ನಿಪಾತೌ । ತತ್ ಪ್ರಜಾಪತೇರ್ವ್ರತಂ ಪ್ರಜಾಪತಿವ್ರತಮ್ ಋತೌ ಭಾರ್ಯಾಗಮನಂ ಚರಂತಿ ಕುರ್ವಂತಿ, ತೇಷಾಂ ದೃಷ್ಟಂ ಫಲಮಿದಮ್ । ಕಿಮ್ ? ತೇ ಮಿಥುನಂ ಪುತ್ರಂ ದುಹಿತರಂ ಚ ಉತ್ಪಾದಯಂತೇ । ಅದೃಷ್ಟಂ ಚ ಫಲಮಿಷ್ಟಾಪೂರ್ತದತ್ತಕಾರಿಣಾಂ ತೇಷಾಮೇವ ಏಷಃ ಯಶ್ಚಾಂದ್ರಮಸೋ ಬ್ರಹ್ಮಲೋಕಃ ಪಿತೃಯಾಣಲಕ್ಷಣಃ ಯೇಷಾಂ ತಪಃ ಸ್ನಾತಕವ್ರತಾದಿ ಬ್ರಹ್ಮಚರ್ಯಮ್ ಋತೋರನ್ಯತ್ರ ಮೈಥುನಾಸಮಾಚರಣಂ ಯೇಷು ಚ ಸತ್ಯಮ್ ಅನೃತವರ್ಜನಂ ಪ್ರತಿಷ್ಠಿತಮ್ ಅವ್ಯಭಿಚಾರಿತಯಾ ವರ್ತತೇ ನಿತ್ಯಮೇವ ॥