ಪ್ರಕೃತಂ ತೂಚ್ಯತೇ ಸೋಽಹೋರಾತ್ರಾತ್ಮಕಃ ಪ್ರಜಾಪತಿರ್ವ್ರೀಹಿಯವಾದ್ಯನ್ನಾತ್ಮನಾ ವ್ಯವಸ್ಥಿತಃ ಏವಂ ಕ್ರಮೇಣ ಪರಿಣಮ್ಯ । ತತ್ ಅನ್ನಂ ವೈ ಪ್ರಜಾಪತಿಃ । ಕಥಮ್ ? ತತಃ ತಸ್ಮಾತ್ ಹ ವೈ ರೇತಃ ನೃಬೀಜಂ ತತ್ಪ್ರಜಾಕಾರಣಂ ತಸ್ಮಾತ್ ಯೋಷಿತಿ ಸಿಕ್ತಾತ್ ಇಮಾಃ ಮನುಷ್ಯಾದಿಲಕ್ಷಣಾಃ ಪ್ರಜಾಃ ಪ್ರಜಾಯಂತೇ ಯತ್ಪೃಷ್ಟಂ ಕುತೋ ಹ ವೈ ಪ್ರಜಾಃ ಪ್ರಜಾಯಂತ ಇತಿ । ತದೇವಂ ಚಂದ್ರಾದಿತ್ಯಮಿಥುನಾದಿಕ್ರಮೇಣ ಅಹೋರಾತ್ರಾಂತೇನ ಅನ್ನರೇತೋದ್ವಾರೇಣ ಇಮಾಃ ಪ್ರಜಾಃ ಪ್ರಜಾಯಂತ ಇತಿ ನಿರ್ಣೀತಮ್ ॥