ಯಸ್ತು ಪುನರಾದಿತ್ಯೋಪಲಕ್ಷಿತ ಉತ್ತರಾಯಣಃ ಪ್ರಾಣಾತ್ಮಭಾವೋ ವಿರಜಃ ಶುದ್ಧೋ ನ ಚಂದ್ರಬ್ರಹ್ಮಲೋಕವದ್ರಜಸ್ವಲೋ ವೃದ್ಧಿಕ್ಷಯಾದಿಯುಕ್ತಃ ಅಸೌ ತೇಷಾಮ್ , ಕೇಷಾಮಿತಿ, ಉಚ್ಯತೇ — ಯಥಾ ಗೃಹಸ್ಥಾನಾಮನೇಕವಿರುದ್ಧಸಂವ್ಯವಹಾರಪ್ರಯೋಜನವತ್ತ್ವಾತ್ ಜಿಹ್ಮಂ ಕೌಟಿಲ್ಯಂ ವಕ್ರಭಾವೋಽವಶ್ಯಂಭಾವಿ ತಥಾ ನ ಯೇಷು ಜಿಹ್ಮಮ್ , ಯಥಾ ಚ ಗೃಹಸ್ಥಾನಾಂ ಕ್ರೀಡಾದಿನಿಮಿತ್ತಮನೃತಮವರ್ಜನೀಯಂ ತಥಾ ನ ಯೇಷು ತತ್ ತಥಾ ಮಾಯಾ ಗೃಹಸ್ಥಾನಾಮಿವ ನ ಯೇಷು ವಿದ್ಯತೇ । ಮಾಯಾ ನಾಮ ಬಹಿರನ್ಯಥಾತ್ಮಾನಂ ಪ್ರಕಾಶ್ಯಾನ್ಯಥೈವ ಕಾರ್ಯಂ ಕರೋತಿ, ಸಾ ಮಾಯಾ ಮಿಥ್ಯಾಚಾರರೂಪಾ । ಮಾಯೇತ್ಯೇವಮಾದಯೋ ದೋಷಾ ಯೇಷ್ವೇಕಾಕಿಷು ಬ್ರಹ್ಮಚಾರಿವಾನಪ್ರಸ್ಥಭಿಕ್ಷುಷು ನಿಮಿತ್ತಾಭಾವಾನ್ನ ವಿದ್ಯಂತೇ, ತತ್ಸಾಧನಾನುರೂಪ್ಯೇಣೈವ ತೇಷಾಮಸೌ ವಿರಜೋ ಬ್ರಹ್ಮಲೋಕ ಇತ್ಯೇಷಾ ಜ್ಞಾನಯುಕ್ತಕರ್ಮವತಾಂ ಗತಿಃ । ಪೂರ್ವೋಕ್ತಸ್ತು ಬ್ರಹ್ಮಲೋಕಃ ಕೇವಲಕರ್ಮಿಣಾಂ ಚಂದ್ರಲಕ್ಷಣ ಇತಿ ॥