తత్ తత్రైవం సతి యే గృహస్థాః । హ వై ఇతి ప్రసిద్ధస్మరణార్థౌ నిపాతౌ । తత్ ప్రజాపతేర్వ్రతం ప్రజాపతివ్రతమ్ ఋతౌ భార్యాగమనం చరన్తి కుర్వన్తి, తేషాం దృష్టం ఫలమిదమ్ । కిమ్ ? తే మిథునం పుత్రం దుహితరం చ ఉత్పాదయన్తే । అదృష్టం చ ఫలమిష్టాపూర్తదత్తకారిణాం తేషామేవ ఎషః యశ్చాన్ద్రమసో బ్రహ్మలోకః పితృయాణలక్షణః యేషాం తపః స్నాతకవ్రతాది బ్రహ్మచర్యమ్ ఋతోరన్యత్ర మైథునాసమాచరణం యేషు చ సత్యమ్ అనృతవర్జనం ప్రతిష్ఠితమ్ అవ్యభిచారితయా వర్తతే నిత్యమేవ ॥