ಗುರುಭಕ್ತೇರ್ವಿದ್ಯಾಪ್ರಾಪ್ತಾವಂತರಂಗಸಾಧನತ್ವಂ ಖ್ಯಾಪಯಿತುಂ ಗುರೂನ್ಪ್ರಣಮತಿ —

ಯೈರಿತಿ ।

ಇಮೇ ಕ್ರಮೇಣ ವ್ಯಾಖ್ಯೇಯತ್ವೇನ ಬುದ್ಧಿಸ್ಥಾಃ । ಪದಾನಿ ಚ ವಾಕ್ಯಾನಿ ಚ ಪ್ರಮಾಣಾನಿ ಚ ಪದವಾಕ್ಯಪ್ರಮಾಣಾನಿ । ‘ಸೋಽಕಾಮಯತ’ ಇತ್ಯಾದೌ ಬ್ರಹ್ಮಸತ್ತ್ವಸಾಧಕತಯಾ ವಿವಕ್ಷಿತಾನ್ಯನುಮಾನಾನಿ ಪ್ರಮಾಣಾನಿ । ತೇಷಾಂ ಪದವಾಕ್ಯಪ್ರಾಮಾಣಾನಾಂ ವಿವೇಚನಪೂರ್ವಕಂ ವ್ಯಾಖ್ಯಾತಾ ಇತ್ಯರ್ಥಃ । ಯದ್ವಾ ಪದಂ ವ್ಯಾಕರಣಂ ತತ್ಸಾಧುತ್ವವಿಚಾರರೂಪತ್ವಾತ್ , ವಾಕ್ಯಂ ಮೀಮಾಂಸಾ ವೇದವಾಕ್ಯವಿಚಾರರೂಪತ್ವಾತ್ , ಪ್ರಮಾಣಂ ನ್ಯಾಯಶಾಸ್ತ್ರಂ ಪ್ರಾಧಾನ್ಯೇನ ಪ್ರತ್ಯಕ್ಷಾದಿಪ್ರಮಾಣವಿಚಾರಾತ್ಮಕತ್ವಾತ್ ; ತತಶ್ಚ ಪದವಾಕ್ಯಪ್ರಮಾಣೈಃ ಸಾಧನಭೂತೈರ್ವ್ಯಾಖ್ಯಾತಾ ಇತ್ಯರ್ಥಃ ॥ ೨ ॥