వృత్తానువాదపూర్వకముత్తరానువాకతాత్పర్యమాహ —

భూర్భువరిత్యాదినా ।

మహ ఇతి వ్యాహృత్యపేక్షయా అన్యా భూర్భువఃసువఃస్వరూపా వ్యాహృతయో దేవతాదిరూపాశ్చతుర్థవ్యాహృత్యాత్మకస్య బ్రహ్మణోఽఙ్గానీత్యుక్తమిత్యర్థః ।

ఎతస్యేతి ।

స ఇతి తచ్ఛబ్దేనాస్మిన్ననువాకే సమాకృష్టస్యేత్యర్థః । పురుషపదాపేక్షయా స ఇతి పుంలిఙ్గనిర్దేశ ఇతి న తద్విరోధః । ఉపాసనార్థం సాక్షాదుపలబ్ధ్యర్థం చేత్యర్థక్రమః ఉపాసనఫలత్వాత్సాక్షాత్కారస్య ।

ఉపాసనార్థం స్థానవిశేషోపదేశే దృష్టాన్తమాహ —

సాలగ్రామ ఇవేతి ।

సాక్షాదుపలబ్ధ్యర్థమిత్యుక్తం ప్రపఞ్చయతి —

తస్మిన్హీతి ।

ఉపాసకానామిదం ప్రసిద్ధమితి ద్యోతనార్థో హి-శబ్దః ।