ಉತ್ತರಾನುವಾಕಸ್ಯ ಸಂಗತಿಂ ವೃತ್ತಾನುವಾದಪೂರ್ವಕಂ ದರ್ಶಯತಿ —
ವ್ಯಾಹೃತ್ಯಾತ್ಮನ ಇತಿ ।
ಅನಂತರಂ ಚೇತಿ ।
ಅವ್ಯವಹಿತಪೂರ್ವಾನುವಾಕ ಇತ್ಯರ್ಥಃ ।
ಇದಾನೀಮಿತಿ ।
ಉಕ್ತವಕ್ಷ್ಯಮಾಣಸರ್ವೋಪಾಸನಾನಾಂ ಕರ್ಮಣಾಂ ಚಾಂಗಭೂತೋ ಯ ಓಂಕಾರಸ್ತಸ್ಯೋಪಾಸನಮಿದಾನೀಂ ವಿಧೀಯತೇ ; ತಥಾ ಚ ಪೂರ್ವೋಕ್ತೋಪಾಸನೇಷ್ವಂಗತ್ವೇನೋಪಸ್ಥಿತಸ್ಯ ಪ್ರಣವಸ್ಯಾತ್ರೋಪಾಸನವಿಧಾನಾತ್ಸಂಗತಿರಿತಿ ಭಾವಃ । ನ ಚೋಂಕಾರಸ್ಯ ಸರ್ವವೈದಿಕಕರ್ಮೋಪಾಸನಾಂಗತ್ವೇ ಮಾನಾಭಾವ ಇತಿ ವಾಚ್ಯಮ್ ; ‘ತಸ್ಮಾದೋಮಿತ್ಯುದಾಹೃತ್ಯ ಯಜ್ಞದಾನತಪಃಕ್ರಿಯಾಃ । ಪ್ರವರ್ತಂತೇ ವಿಧಾನೋಕ್ತಾಃ ಸತತಂ ಬ್ರಹ್ಮವಾದಿನಾಮ್’ ಇತಿ ಭಗವದ್ವಚನಸ್ಯೈವ ಮಾನತ್ವಾತ್ । ಬ್ರಹ್ಮವಾದಿನಾಂ ವೇದವಾದಿನಾಮಿತ್ಯರ್ಥಃ ।