వృత్తానువాదపూర్వకమానన్దవల్ల్యాస్తాత్పర్యమాహ –
సంహితాదీత్యాదినా ।
వక్ష్యమాణవిద్యావైలక్షణ్యార్థమాహ –
కర్మభిరవిరుద్ధానీతి ।
కర్మభిరవిరుద్ధమేవాన్యదప్యుపాసనముక్తమిత్యాహ –
అనన్తరం చేతి ।
నను కర్మసముచ్చితేన వ్యాహృతిశరీరబ్రహ్మోపాసనేన స్వారాజ్యప్రాపకేణైవ సబీజస్య సంసారస్య నివృత్తిసమ్భవాత్కిం నిరుపాధికబ్రహ్మవిద్యారమ్భేణేత్యాశఙ్క్యాహ –
న చైతావతేతి ।
కర్మసముచ్చితేనాపి సోపాధికాత్మదర్శనేనేత్యర్థః ।
అత ఇతి ।
సోపాధికాత్మదర్శనస్యాధిష్ఠానయాథాత్మ్యదర్శనరూపత్వాభావేనాశేషసంసారబీజోపమర్దనే సామర్థ్యరహితత్వాదిత్యర్థః ।