ವೃತ್ತಾನುವಾದಪೂರ್ವಕಮುತ್ತರಗ್ರಂಥಮವತಾರಯತಿ –
ಅಸ್ತಿ ನಾಸ್ತೀತ್ಯಾದಿನಾ ।
ವ್ಯಾಖ್ಯಾತೋ ನಿರಾಕೃತ ಇತ್ಯರ್ಥಃ ।
ಕಥಂ ನಿರಾಕೃತ ಇತ್ಯಾಕಾಂಕ್ಷಾಯಾಮಾಹ –
ಕಾರ್ಯೇತಿ ।
ಕಾರ್ಯಂ ಚ ರಸಲಾಭಶ್ಚ ಪ್ರಾಣನಂ ಚಾಭಯಪ್ರತಿಷ್ಠಾ ಚ ಭಯದರ್ಶನಂ ಚ, ಏತಾನ್ಯೇವೋಪಪತ್ತಯ ಇತ್ಯರ್ಥಃ ।
ವಿಷಯಾವಿತಿ ।
ಅವಿಶಿಷ್ಟಾವಿತಿ ಶೇಷಃ ।
ಉಚ್ಯತ ಇತಿ ।
'ಸ ಯ ಏವಂವಿತ್’ ಇತ್ಯಾದಿನಾ ಬ್ರಹ್ಮಪ್ರಾಪ್ತಿರ್ವಿದುಷ ಉಚ್ಯತ ಇತ್ಯರ್ಥಃ ।
ನನು ತರ್ಹಿ ಮಧ್ಯಮೋಽನುಪ್ರಶ್ನೋ ವಿಶಿಷ್ಯೇತ ; ನೇತ್ಯಾಹ –
ಮಧ್ಯಮ ಇತಿ ।
ವಿದುಷೋ ಬ್ರಹ್ಮಪ್ರಾಪ್ತಿಪ್ರತಿಪಾದನೇನಾಂತ್ಯಪ್ರಶ್ನಾಪಾಕರಣೇ ಕೃತೇ ಸತಿ ಅರ್ಥಾದವಿದುಷಸ್ತತ್ಪ್ರಾಪ್ತಿರ್ನಾಸ್ತೀತಿ ನಿರ್ಣಯಲಾಭಾನ್ಮಧ್ಯಮಪ್ರಶ್ನೋ ನಿರಾಕರ್ತವ್ಯತ್ವೇನ ನಾವಶಿಷ್ಯತೇ, ಅತೋ ನ ತದಪಾಕರಣಾಯ ಶ್ರುತ್ಯಾ ಪ್ರಯತ್ನಃ ಕೃತ ಇತ್ಯರ್ಥಃ । ಇದಮುಪಲಕ್ಷಣಮ್ ; ಅವಿದುಷೋ ಬ್ರಹ್ಮಪ್ರಾಪ್ತಿಪ್ರಶ್ನಸ್ಯಾತಿಫಲ್ಗುತ್ವಾಚ್ಚ ತದಪಾಕರಣಾಯ ಶ್ರುತ್ಯಾ ನ ಯತ್ಯತ ಇತ್ಯಪಿ ದ್ರಷ್ಟವ್ಯಮ್ ।
ವೇದನಸ್ಯೋತ್ಕರ್ಷಾದಿರಹಿತಾದ್ವಿತೀಯಸ್ವಪ್ರಕಾಶಬ್ರಹ್ಮವಿಷಯಕತ್ವಲಾಭೇ ಹೇತುಮಾಹ –
ಏವಂಶಬ್ದಸ್ಯೇತಿ ।
ಲೋಕಶಬ್ದಸ್ಯ ಪ್ರತ್ಯಕ್ಷಸಿದ್ಧಭೋಗ್ಯಮಾತ್ರಪರತ್ವಂ ವ್ಯಾವರ್ತಯತಿ –
ದೃಷ್ಟಾದೃಷ್ಟೇತಿ ।
'ಅಸ್ಮಾಲ್ಲೋಕಾತ್ಪ್ರೇತ್ಯ’ ಇತ್ಯನೇನ ಸರ್ವಸ್ಮಾತ್ಕರ್ಮಫಲಾದ್ವೈರಾಗ್ಯಂ ವಿವಕ್ಷಿತಮಿತ್ಯಾಹ –
ನಿರಪೇಕ್ಷೋ ಭೂತ್ವೇತಿ ।
ಅತ್ರ ಯೇನ ಕ್ರಮೇಣೈವ ವೇದನಂ ಪ್ರಾಪ್ತಂ ತತ್ಕ್ರಮಾನುವಾದಪೂರ್ವಕಮೇವಂ ವೇದನಫಲಮುಚ್ಯತ ಇತಿ ಪ್ರತೀಯತೇ, ತಾಂ ಪ್ರತೀತಿಮಾಶ್ರಿತ್ಯ ವ್ಯಾಖ್ಯಾನಮಿದಮ್ ; ವಿವಕ್ಷಿತಂ ತು ವ್ಯಾಖ್ಯಾನಂ ಕರಿಷ್ಯಮಾಣಚಿಂತಾವಸಾನೇ ಭವಿಷ್ಯತೀತಿ ಮಂತವ್ಯಮ್ ।
ಏವಂ ವಿರಕ್ತೋ ಭೂತ್ವಾ ಪ್ರಥಮಂ ಪುಮಾನ್ಕಿಂ ಕರೋತಿ ? ತತ್ರಾಹ –
ಏತಮಿತಿ ।
ಯಥೋಕ್ತಮಿತಿ ।
'ಸ ವಾ ಏಷ ಪುರುಷೋಽನ್ನರಸಮಯಃ’ ಇತ್ಯತ್ರಾನ್ನರಸವಿಕಾರತ್ವೇನೋಕ್ತಮಿತ್ಯರ್ಥಃ । ವಿಷಯಜಾತಮಿತ್ಯನೇನ ವ್ಯಷ್ಟಿಪಿಂಡವ್ಯತಿರಿಕ್ತಃ ಸಮಷ್ಟಿಪಿಂಡಾತ್ಮಾ ವಿರಾಡುಚ್ಯತೇ ।
ವಿರಾಜಂ ವ್ಯಷ್ಟಿಪಿಂಡವ್ಯತಿರಿಕ್ತಂ ನ ಪಶ್ಯತಿ ಚೇತ್ಕಥಂ ತರ್ಹಿ ಪಶ್ಯತೀತ್ಯಾಕಾಂಕ್ಷಾಯಾಂ ತದ್ದರ್ಶಯನ್ನುಪಸಂಕ್ರಾಮತೀತ್ಯಸ್ಯಾರ್ಥಮಾಹ –
ಸರ್ವಮಿತಿ ।
ಸಮಷ್ಟಿಸ್ಥೂಲಾತ್ಮಾನಂ ವಿರಾಜಮನ್ನಮಯಾತ್ಮಾನಂ ಪಶ್ಯತಿ ಸಮಷ್ಟಿವ್ಯಷ್ಟ್ಯಾತ್ಮಕಮನ್ನಲಕ್ಷಣಂ ಬ್ರಹ್ಮಾಹಮಿತಿ ಪಸ್ಯತೀತಿ ಯಾವತ್ ।
ತತ ಇತಿ ।
ವಿರಾಡಾತ್ಮಕಾದನ್ನಮಯಕೋಶಾದಾಂತರಮಿತ್ಯರ್ಥಃ ।
ಏತಮಿತಿ ।
'ಅನ್ಯೋಽಂತರ ಆತ್ಮಾ ಪ್ರಾಣಮಯಃ’ ಇತ್ಯತ್ರ ಪ್ರಕೃತಮಿತ್ಯರ್ಥಃ ।
ಅವಿಭಕ್ತಮಿತಿ ।
ಸೂತ್ರಾತ್ಮನಾ ಏಕೀಭೂತಮಿತ್ಯರ್ಥಃ । ಅತ ಏವ ಸರ್ವಪಿಂಡವ್ಯಾಪಿತ್ವರೂಪಂ ಸರ್ವಾನ್ನಮಯಾತ್ಮಸ್ಥತ್ವವಿಶೇಷಣಂ ಪ್ರಾಣಮಯಸ್ಯೋಪಪದ್ಯತೇ । ತಥಾ ಚಾನ್ನಮಯಾತ್ಮದರ್ಶನಾನಂತರಂ ತದ್ಧಿತ್ವಾ ಯಥೋಕ್ತಂ ಪ್ರಾಣಮಯಾತ್ಮಾನಂ ಪಶ್ಯತೀತ್ಯರ್ಥಃ । ಏವಮುತ್ತರತ್ರಾಪಿ ಯೋಜನೀಯಮ್ ।
ಉಪಸಂಕ್ರಾಮತೀತಿ ।
ಏವಂ ಕ್ರಮೇಣಾನಂದಮಯಮಾತ್ಮಾನಮುಪಸಂಕ್ರಮ್ಯಾನಂತರಮಾನಂದಮಯಂ ಪ್ರತಿ ಪುಚ್ಛಪ್ರತಿಷ್ಠಾಭೂತಮುತ್ಕರ್ಷಾದಿರಹಿತಂ ಸತ್ಯಜ್ಞಾನಾನಂತಲಕ್ಷಣಂ ಬ್ರಹ್ಮಾಹಮಸ್ಮೀತಿ ಪಶ್ಯಂಸ್ತದೇವ ಪ್ರಾಪ್ನೋತೀತಿ ಭಾವಃ ।
ಅಥೇತಿ ।
ಏವಂವಿದೇವಂ ವೇದನಾನಂತರಮಿತ್ಯರ್ಥಃ ॥