ಪುತ್ರೇಣೇತಿ ।
ಪುತ್ರಜನ್ಮನಾ ಪಿತೃಋಣಮೋಕ್ಷದ್ವಾರೇಣ ಯಾ ಪಿತುರಮೃತತ್ವಪ್ರಾಪ್ತಿಃ ಸಾ ಅತ್ರಾಮೃತಪದೇನ ವಿವಕ್ಷಿತೇತ್ಯರ್ಥಃ ।
ಉಪಸ್ಥನಿಮಿತ್ತಮಿತಿ ।
ಯಸ್ಮಾದೇತತ್ಸರ್ವಮುಪಸ್ಥಹೇತುಕಂ ತಸ್ಮಾದನೇನೈವ ರೂಪೇಣ ಬ್ರಹ್ಮ ತತ್ರ ಸ್ಥಿತಮಿತ್ಯುಪಾಸ್ಯಮಿತ್ಯರ್ಥಃ । ಇದಮುಪಾಸನಮ್ ‘ವಿಮುಕ್ತಿರಿತಿ ಪಾಯೌ’ ಇತ್ಯತ್ರೈವ ದ್ರಷ್ಟವ್ಯಮ್ । ಆಧ್ಯಾತ್ಮಿಕತ್ವಾತ್ ।
ಸರ್ವಂ ಹೀತಿ ।
ಹಿ ಯಸ್ಮಾತ್ಸರ್ವಮಾಕಾಶೇ ಪ್ರತಿಷ್ಠಿತಂ ತಸ್ಮಾದ್ಯತ್ಸರ್ವಮಾಕಾಶೇ ವರ್ತತೇ ತತ್ಸರ್ವರೂಪೇಣಾಕಾಶೇ ಬ್ರಹ್ಮೈವ ಪ್ರತಿಷ್ಠಿತಮಿತ್ಯುಪಾಸ್ಯಮಿತ್ಯರ್ಥಃ ।
'ತತ್ಪ್ರತಿಷ್ಠಾ...’ ಇತ್ಯತ್ರ ಬ್ರಹ್ಮಾಭಿನ್ನಮಾಕಾಶಮುಪಾಸ್ಯಂ ಕೇವಲಸ್ಯಾಕಾಶಸ್ಯೋಪಾಸ್ಯತ್ವಾಯೋಗಾದಿತ್ಯಾಶಯೇನ ತಸ್ಯ ಬ್ರಹ್ಮಾಭಿನ್ನತ್ವಮಾಹ –
ತಚ್ಚೇತಿ ।
ಸರ್ವಾಶ್ರಯತ್ವೇನ ಪ್ರಕೃತಮಿತ್ಯರ್ಥಃ ।
ತಸ್ಮಾತ್ತದಿತಿ ।
ವ್ಯಾಪಕತ್ವನಿರ್ಲೇಪತ್ವನಿರವಯವತ್ವಸೂಕ್ಷ್ಮತ್ವಸರ್ವಾಶ್ರಯತ್ವಾದಿರೂಪಲಕ್ಷಣಸಾಮ್ಯೇನಾಕಾಶಸ್ಯ ಬ್ರಹ್ಮಾಭಿನ್ನತ್ವಸಂಭವಾತ್ತದ್ಬ್ರಹ್ಮಭೂತಮಾಕಾಶಮಿತ್ಯರ್ಥಃ ।
ಪ್ರತಿಷ್ಠಾವಾನಿತಿ ।
ಅನ್ನಪಾನಾದಿಭಿಃ ಸ್ಥಿತಿಮಾನಿತ್ಯರ್ಥಃ ।
ನನು ‘ಕ್ಷೇಮ ಇತಿ ವಾಚಿ’ ಇತ್ಯಾದೌ ಫಲಾಶ್ರವಣಾತ್ಕಥಂ ತದುಪಾಸನೇಷು ಪ್ರವೃತ್ತಿರಿತ್ಯಾಶಂಕ್ಯಾಹ –
ಯದ್ಯತ್ರೇತಿ ।
ಯತ್ರ ವಾಗಾದೌ ಯತ್ಫಲಂ ಕಾರ್ಯಂ ಕ್ಷೇಮಾದಿಕಂ ಶ್ರುತಂ ತದ್ರೂಪೇಣ ಬ್ರಹ್ಮೈವೋಪಾಸ್ಯಮಿತ್ಯುಕ್ತಮಿತ್ಯರ್ಥಃ ।
ತತಃ ಕಿಮ್ ? ಅತ ಆಹ –
ತದುಪಾಸನಾದಿತಿ ।
ಕ್ಷೇಮಾದಿಗುಣೇನ ಬ್ರಹ್ಮೋಪಾಸನಾತ್ಕ್ಷೇಮಾದಿಮಾನೇವ ಭವತ್ಯೌಚಿತ್ಯಾದಿತಿ ದ್ರಷ್ಟವ್ಯಮಿತ್ಯರ್ಥಃ ।
ಅತ್ರಾರ್ಥೇ ಶ್ರುತಿಮಪ್ಯಾಹ –
ಶ್ರುತ್ಯಂತರಾಚ್ಚೇತಿ ।
ತದೇವೇತಿ ।
ತದನುರೂಪಮೇವ ಫಲಂ ಭವತೀತ್ಯರ್ಥಃ । ‘ತನ್ಮಹಃ’ ಇತ್ಯಾದೌ ತತ್ಪದಂ ಬ್ರಹ್ಮಪರಮ್ ; ತಥಾ ಚ ವಾರ್ತ್ತಿಕಮ್ - ‘ತದ್ಬ್ರಹ್ಮ ಮಹ ಇತ್ಯೇವಮುಪಾಸೀತ ತತಃ ಫಲಮ್’ ಇತ್ಯಾದಿ ॥