ಪರಿಬೃಢತಮಮಿತಿ ।
ವಿರಾಡಾತ್ಮಕಮಿತ್ಯರ್ಥಃ ।
ಬ್ರಹ್ಮವಾನಿತಿ ।
ಬ್ರಹ್ಮಣೋ ವಿರಾಜೋ ಯೋ ಗುಣೋ ಭೋಗಃ ತದ್ವಾನ್ಭವತೀತ್ಯರ್ಥಃ ।
ಪರಸ್ಯೇತಿ ।
ಪರಸ್ಯ ಮಾಯೋಪಾಧಿಕಸ್ಯ ಬ್ರಹ್ಮಣಃ ಸ್ವರೂಪತಯೋಕ್ತಂ ಯದಾಕಾಶಂ ತದಾಕಾಶಂ ಪರಿಮರತ್ವಗುಣಕಮುಪಾಸೀತೇತ್ಯರ್ಥಃ ।
ಆಕಶಸ್ಯ ಪರಿಮರತ್ವಗುಣೋಪಪಾದನಾಯ ಪ್ರಥಮಂ ವಾಯೋಃ ಪರಿಮರತ್ವಮಾಹ –
ಪರಿಮರ ಇತ್ಯಾದಿನಾ ।
ಶ್ರುತ್ಯಂತರೇತಿ ।
ವಾಯುಂ ಪ್ರಕೃತ್ಯ ‘ತಮೇತಾಃ ಪಂಚ ದೇವತಾ ಅಪಿಯಂತಿ’ ಇತ್ಯಾದಿಶ್ರುತ್ಯಂತರಪ್ರಸಿದ್ಧೇರಿತ್ಯರ್ಥಃ ।
ಇದಾನೀಮಾಕಾಶಸ್ಯ ಪರಿಮರತ್ವಂ ಸಾಧಯತಿ –
ಸ ಏವಾಯಮಿತಿ ।
ವಾಯುಂ ಪ್ರತ್ಯಾಕಾಶಸ್ಯ ಕಾರಣತ್ವಾದ್ವಾಯ್ವನನ್ಯತ್ವಮಿತ್ಯರ್ಥಃ । ತಂ ವಾಯ್ವಾತ್ಮಾನಮಾಕಾಶಂ ಬ್ರಹ್ಮಣಃ ಸ್ವರೂಪಭೂತಂ ಪರಿಮರತ್ವಗುಣಕಮುಪಾಸೀತೇತ್ಯರ್ಥಃ ।
ಸಪತ್ನಾ ದ್ವಿವಿಧಾಃ - ದ್ವಿಷಂತೋಽದ್ವಿಷಂತಶ್ಚ ; ತತಃ ಸಪತ್ನಾನಾಂ ದ್ವಿಷಂತ ಇತಿ ವಿಶೇಷಣಮಿತ್ಯಾಹ –
ದ್ವಿಷಂತ ಇತ್ಯಾದಿನಾ ।
ಅದ್ವಿಷಂತೋಽಪಿ ಚೇತಿ ।
ಏನಮದ್ವಿಷಂತೋಽಪೀತ್ಯರ್ಥಃ ॥