సర్వోపేతా చ తద్దర్శనాత్॥౩౦॥ మాయాశక్తిమద్బ్రహ్మణః జగత్సర్వం వదతః సమన్వయస్యాశరీరస్య న మాయేతి న్యాయేన విరోధసందేహే సంగతిమాహ –

విచిత్రేతి ।

అన్తర్యామ్యధికరణే (బ్ర.అ.౧.పా.౩.సూ.౧౮) త్వవిద్యోపార్జితత్వసమ్బన్ధే జగద్బ్రహ్మణోః సిద్ధే శరీరరహితస్యాపి నియన్తృత్వసమ్భవ ఉక్తః , ఇహ త్వశరీరస్యావిద్యైవాక్షిప్యత ఇతి భేదః॥౩౦॥

తదుక్తమిత్యేతద్దేవాదివదపీతి (బ్ర.అ.౨.పా.౧.సూ.౨౮) సూత్రోక్తిపరత్వేన వ్యాచష్టే –

కులాలాదిభ్య ఇతి ।

ఆత్మని చైవ (బ్ర.అ.౨.పా.౧.సూ.౨౫) మితి సూత్రోక్తిపరత్వేనాపి వ్యాచష్టే –

యథా త్వితి ।

శక్తిమన్తో దేవాదయో యద్యపి శరీరిణః , తథాపి బాహ్యసాధనానపేక్షాః । యది తు తత్ర దృష్టం శరీరిత్వం శక్తిమత్త్వేన బ్రహ్మణ్యాపాద్యతే , తర్హి కర్తృత్వేన కులాలాదిషు దృష్టం బాహ్యసాధనాపేక్షత్వం దేవాదిష్వప్యాపాద్యేతేతి ప్రతిబన్ధ్యా ప్రమేయసంభావనోక్తా । శ్రూయమాణమ్ ఇతి ప్రమాణముక్తమ్॥౩౧॥

ఇతి దశమం సర్వోపేతాధికరణమ్॥