ಆನಂದಾದಯಃ ಪ್ರಧಾನಸ್ಯ ॥೧೧॥ ಪ್ರಾಣಸ್ಯ ಸವಿಶೇಷತ್ವಾದ್ಯುಕ್ತಃ ಶಾಖಾಂತರೀಯವಸಿಷ್ಠತ್ವಾದ್ಯುಪಸಂಹಾರಃ , ಬ್ರಹ್ಮಣಸ್ತು ನಿರ್ವಿಶೇಷತ್ವಾತ್ ಸ್ವಶಾಖಾಗತಧರ್ಮೈರೇವ ಪ್ರಮಿತಿಸಿದ್ಧೇರ್ನಾನಂದಾದ್ಯುಪಸಂಹಾರ ಇತಿ ಪ್ರತ್ಯವಸ್ಥಾನಾತ್ಸಂಗತಿಃ । ನನು ವೇದ್ಯಬ್ರಹ್ಮೈಕ್ಯಾದ್ ಗುಣೋಪಸಂಹಾರ ಉತ್ಸರ್ಗಪ್ರಾಪ್ತಃ ।

ನ ಚಾತ್ರಾಪವಾದಕಮೇವಂಶಬ್ದವತ್ ಕಿಂಚಿದುಪಲಭ್ಯತೇ ತತ್ಕಿಮರ್ಥಮಧಿಕರಣಮಾರಭ್ಯತೇ ? ಅತ ಆಹ –

ಗುಣವಿಧಾನಸ್ಯೇತಿ ।

ಯದ್ಯಾನಂದಾದಯೋ ಬ್ರಹ್ಮೈಕ್ಯಾತ್ಸರ್ವಶಾಖಾಸೂಪಸಂಹ್ರಿಯೇರನ್ , ತರ್ಹಿ ಸಂಯದ್ವಾಮತ್ವಾದಯಃ ಕಿಮಿತಿ ನೋಪಸಂಹೃತಾ ಇತಿ ಪ್ರತಿಬಂದ್ಯಾಶಂಕಾಯಾಂ ಸಂಯದ್ವಾಮತ್ವಾದಯ ಉಪಾಸನಾರ್ಥಂ ವಿಧೇಯಾ ವಿಧಿಪ್ರಯುಕ್ತಾಪೂರ್ವಸ್ಯ ಚಾನಿರ್ಜ್ಞಾತಪರಿಮಾಣತ್ವಾದಪೂರ್ವಪ್ರಯುಕ್ತಧರ್ಮಾಣಾಂ ಯಥಾವಿಧಿ ವ್ಯವಸ್ಥಾ , ಸತ್ಯಜ್ಞಾನಾದಯಸ್ತು ವಸ್ತುತತ್ತ್ವಪ್ರಮಿತ್ಯರ್ಥಾ ಇತಿ ಯತ್ರ ಯತ್ರ ವಸ್ತುತತ್ತ್ವಪ್ರತಿಪತ್ತಿಸ್ತತ್ರ ತತ್ರ ನೇತವ್ಯಾ ಇತಿ ವಿಶೇಷಪ್ರದರ್ಶನೇನ ಪ್ರತಿಬಂದೀಂ ಪರಿಹರ್ತುಮಯಮಾರಂಭ ಇತ್ಯರ್ಥಃ । ಶಿಷ್ಟಂ ಸ್ಪಷ್ಟಾರ್ಥಮ್ । ಯತ್ತು - ನಿರ್ವಿಶೇಷೇ ಪದಾಂತರವೈಯರ್ಥ್ಯಾದನುಪಸಂಹಾರಃ – ಇತಿ , ತತ್ರೋಚ್ಯತೇ ; ಸತ್ಯಜ್ಞಾನಾನಂದಾನಂತಾತ್ಮತ್ವಪದಾರ್ಥಾ ಇತರೇತರಂ ವಿಶೇಷಣವಿಶೇಷ್ಯಭೂತಾ ವಿರುದ್ಧಾನೃತಜಡದುಃಖಪರಿಚ್ಛೇದಾನಾತ್ಮತಾಭ್ರಾಂತೀರ್ವ್ಯಾವರ್ತಯಂತಃ ಸತ್ತಾದಿಪರಾಪರಸಾಮಾನ್ಯಾಧಾರಭೂತಾಮೇಕಾಮಾನಂದವ್ಯಕ್ತಿಂ ಲಕ್ಷಯಂತಿ ಸದ್ ದ್ರವ್ಯಂ ಕುಂಭ ಇತಿ ಪದಾನೀವ ಕುಂಭವ್ಯಕ್ತಿಮ್ । ಏತಾದೃಶಬ್ರಹ್ಮಸಿದ್ಧಿಶ್ಚ ನೈಕಸ್ಮಾತ್ಪದಾತ್ತನ್ಮಾತ್ರಪ್ರಯೋಗೇ ವಿರೋಧಾಭಾವಾಲ್ಲಕ್ಷಣಾಯಾ ಅನುತ್ಥಾನಾತ್ಪ್ರಯೋಕ್ತವ್ಯೇ ಚ ಪದಾಂತರೇ ಯಾವಂತ್ಯೋ ಭ್ರಾಂತಯಃ ಸಂಭಾವ್ಯಂತೇ , ತನ್ನಿರಸನಸಮರ್ಥಪದವೃಂದಂ ಪ್ರಯೋಕ್ತವ್ಯಮಿತಿ ಸಮಾರೋಪಿತಭ್ರಮನಿರಸನಸಮರ್ಥಂ ಪದಾರ್ಥವೃಂದಂ ಸರ್ವತ್ರೋಪಸಂಹರ್ತವ್ಯಮಿತಿ ॥೧೧॥೧೨॥೧೩॥

ಇತಿ ಷಷ್ಠಮಾನಂದಾದ್ಯಧಿಕರಣಮ್ ॥