ಅನಾವಿಷ್ಕುರ್ವನ್ನನ್ವಯಾತ್ ॥೫೦॥

ನನು ಭಾವಶುದ್ಧಿರಪಿ ಬಾಲಚರಿತಂ ಭವತಿ ತನ್ಮಾತ್ರಮೇವ ಗೃಹ್ಯತಾಮತ ಆಹ –

ಯಾವದ್ ಬಾಲಚರಿತಶ್ರುತೇರಿತಿ ।

ಯಾವದಸ್ತಿ ಬಾಲಚರಿತಂ ತಾವತಃ ಸರ್ವಸ್ಯ ಬಾಲ್ಯೇನೇತಿ ಶ್ರುತೇರವಗಮಾನ್ನ ಸಂಕೋಚಃ ಕಾರ್ಯ ಇತ್ಯರ್ಥಃ ।

ಅಪಿ ಚ ಯಥಾ ಪೂರ್ವತ್ರ ಮೌನಶಬ್ದಸ್ಯ ಜ್ಞಾನಾತಿಶಯೇ ಪ್ರಸಿದ್ಧಿಮಾಶ್ರಿತ್ಯಾಪ್ರಾಪ್ತಮೌನವಿಧಿರಾಶ್ರಿತಃ, ಏವಮತ್ರಾಪಿ ಬಾಲ್ಯಶಬ್ದಸ್ಯ ಕಾಮಚಾರಾದೌ ಪ್ರಸಿದ್ಧೇಸ್ತದೇವ ಬಾಲ್ಯಂ ನ ಹಿ ಶುದ್ಧಭಾವೇಽಪಿ ತಪಸ್ವಿನಿ ಬಾಲಶಬ್ದಂ ವೃದ್ಧಾಃ ಪ್ರಯುಂಜತ ಇತ್ಯಭಿಪ್ರೇತ್ಯಾಹ –

ಕಾಮಚಾರೇತಿ ।

ಭಾವಶುದ್ಧಿರೂಪಂ ತದೇವೇತಿ ।

ಯದ್ಯಪಿ ಕೇವಲಾಯಾಂ ಭಾವಶುದ್ಧೌ ಬಾಲ್ಯಶಬ್ದೋನ ಪ್ರಸಿದ್ಧಃ; ತಥಾಪಿ ಕಾಮಚಾರಾದಿಮತಿ ಬಾಲೇ ಭಾವಶುದ್ಧಿರಸ್ತಿ, ತಾವನ್ಮಾತ್ರಪರತಯಾ ಬಾಲ್ಯಶಬ್ದಃ ಸಂಕೋಚ್ಯತ ಇತ್ಯರ್ಥಃ ।

ಸಂಕೋಚೇ ಚ ಕಾರಣಂ ಶೇಷಿವಿಧ್ಯನುಗ್ರಹ ಏಕಮುಕ್ತಮ್, ಅಪರಂ ಚಾಹ –

ಏವಂ ಚೇತಿ ।

ಶಾಸ್ತ್ರಾಂತರಬಾಧನಂ ಯದನ್ಯಾಯ್ಯಂ ತದೇವಂ ಸತಿ ನ ಭವಿಷ್ಯತೀತಿ ಯೋಜನಾ ॥೫೦॥

ಇತಿ ಪಂಚದಶಮನಾವಿಷ್ಕಾರಾಧಿಕರಣಮ್ ॥