ಯತ್ರೈಕಾಗ್ರತಾ ತತ್ರಾವಿಶೇಷಾತ್॥೧೧॥ ಅಂಗಾನಾಶ್ರಿತೋಪಾಸನೇಷ್ವಾಸನನಿಯಮ ಉಕ್ತೇ ತದ್ವದ್ದಿಗಾದಿನಿಯಮಶಂಕೋತ್ಥಾನಾತ್ಸಂಗತಿಃ । ನನು ಸಮೇ ಶುಚಾವಿತಿ ದೇಶನಿಯಮಸ್ಯ ಶ್ರುತತ್ವಾತ್ ಕಥಂ ವಿಚಾರಾವಸರಃ? ತತ್ರಾಹ –

ಸಮ ಇತಿ ।

ಶ್ರುತೌ ಶರ್ಕರಾಃ ಸೂಕ್ಷ್ಮಪಾಷಾಣಾಃ ಜಲಾಶ್ರಯವರ್ಜನಂ ಶೀತನಿವೃತ್ತ್ಯರ್ಥಮ್ । ಚಕ್ಷುಃಪೀಡನೋ ಮಶಕಃ । ಪ್ರಾಚೀನಪ್ರವಣೇ ಪ್ರಾಗ್ದೇಶನಿಮ್ನೇ ದೇಶೇ । ವೈಶ್ವದೇವೇನ ಯಾಗವಿಶೇಷೇಣ । ಐಕಗ್ರ್ಯಂ ಹಿ ಧ್ಯಾನಂ ಪ್ರತ್ಯಂತರಂಗಸಾಧನಮ್ ।

ತಸ್ಮಿನ್ಮಧ್ಯಾಹ್ನಾದೌ ಸಂಭವತ್ಯಪಿ ಯದಿ ಪ್ರದೋಷಕಾಲಃ ಪ್ರಾಚ್ಯಾದಿದಿಕ್ತೀರ್ಥಾದಿದೇಶಃ ಪ್ರತೀಕ್ಷ್ಯೇರನ್ಸ್ತರ್ಹಿ ಶೇಷಿಧ್ಯಾನಬಾಧಃ ಸ್ಯಾತ್ತಸ್ಮಾದನಿಯಮ ಇತಿ ಸಿದ್ಧಾಂತಮಾಹ –

ಯತ್ರೈಕಾಗ್ರತಾ ಮನಸ ಇತಿ ।

ಯದುಕ್ತಮಂಗೋಪಾಸ್ತಸ್ತ್ಯತಿರಿಕ್ತೋಪಾಸ್ತಿರ್ದಿಗಾದಿನಿಯಮಮಪೇಕ್ಷತೇ ವೈದಿಕಾನುಷ್ಠಾನತ್ವಾದ್ವೈಶ್ವದೇವವದಿತಿ, ತತ್ರ ಶ್ರುತದೇಶಾದಿಮತ್ತ್ವಮುಪಾಧಿರಿತಿ ವದನ್ ಅವಿಶೇಷಾದಿತಿ ಸೌತ್ರಂ ಹೇತುಂ ವ್ಯಾಚಷ್ಟೇ –

ನ ಹ್ಯತ್ರೇತಿ ।

ಶ್ರುತವಿಶೇಷಣೇನ ಚ ವೃಥಾಚೇಷ್ಟಾಯಾ ವಿಪಕ್ಷಸ್ಯ ವ್ಯಾವರ್ತನಾನ್ನ ಪಕ್ಷೇತರತಾ । ತಸ್ಮಾತ್ತತ್ರೈವ ಭಾವನಾಮುಪಾಸನಾಂ ಪ್ರಯೋಜಯೇದಿತ್ಯನ್ವಯಃ॥೧೧॥

ಇತಿ ಸಪ್ತಮಮೇಕಾಗ್ರತಾಧಿಕರಣಮ್॥