ಆಸೀನಃ ಸಂಭವಾತ್॥೭॥ ಅಂಗಾವಬದ್ಧೋಪಾಸನಚಿಂತನಸಮನಂತರಂ ತತ್ಪರ್ಯುದಾಸಂ ಸಿದ್ಧಮಾದಾಯೇತರೇಷೂಪಾಸನೇಷ್ವಾಸನನಿಯಮಚಿಂತನಾತ್ಸಂಗತಿರಿತ್ಯಭಿಪ್ರೇತ್ಯ ವಿಷಯಂ ಪರಿಶಿನಷ್ಟಿ –

ಕರ್ಮಾಂಗಸಂಬಂಧಿಷ್ವಿತಿ ।

ನಾಪಿ ಸಮ್ಯಗ್ದರ್ಶನ ಇತಿ ।

ಶ್ರವಣಮನನಧ್ಯಾನಾಭ್ಯಾಸವಾದಿತಮನಸಾ ಸಾಕ್ಷಾತ್ಕಾರೋತ್ಪತ್ತಾವಿತ್ಯರ್ಥಃ ।

ನನು ವಸ್ತ್ವಧೀನೇಽಪಿ ಜ್ಞಾನೇ ಚಕ್ಷುರಾದಿವದಾಸನಮಪ್ಯಪೇಕ್ಷ್ಯತಾಮತ ಆಹ –

ಪ್ರಮಾಣತಂತ್ರತ್ವಾಚ್ಚೇತಿ ।

ನನು ಪ್ರಮಾಣಮಪಿ ಶುಕ್ತ್ಯಾದೌ ನಿಕಟೋಪಸರ್ಪಣಾದಿವದಾಸನಮಪೇಕ್ಷತಾಂ, ತತ್ರಾಹ –

ಪ್ರಮಾಣಂ ಚೇತಿ ।

ಧ್ಯಾನಾದಿಸಂಸ್ಕೃತಮಪ್ರತಿಬದ್ಧಂ ಚಿತ್ತಂ ಪ್ರದೀಪವತ್ಸ್ವಯಮೇವ ಪ್ರಮಾ ಕರೋತೀತ್ಯರ್ಥಃ ।

ಯಥಾ ವಾ ಸಮ್ಯಗ್ದರ್ಶನಮಪೀತಿ ।

ತತ್ತ್ವಮಸ್ಯಾದಿವಾಕ್ಯಜನಿತಜ್ಞಾನಾಭ್ಯಾಸಾತ್ಮಕಮಿತ್ಯರ್ಥಃ ।

ಧ್ಯಾಯತಿಶ್ಚೇತ್ಯಾದಿಭಾಷ್ಯಮಾಕ್ಷಿಪತಿ –

ನನ್ವಿತಿ ।

ಭಾಷ್ಯಗತೋಪಚಾರಶಬ್ದೋ ನ ಯುಕ್ತಃ, ಬಕಾದಿಷ್ವಪಿ ಧ್ಯಾನಸದ್ಭಾವಾದತ ಆಹ –

ಪ್ರಯುಜ್ಯತ ಇತಿ ।

ಅಸಾವವಸ್ಥಾ ಕಿಂ ತಿಷ್ಠತೋ ನ ಭವತಿ, ಅಪಿ ತು ಭವತ್ಯೇವ; ತಿಷ್ಠತೋಽಪ್ಯೈಕಾಗ್ನ್ಯಸಂಭವಾದಿತ್ಯರ್ಥಃ । ತಿಷ್ಠತೋ ಹಿ ದೇಹಪತನಪ್ರತಿಬಂಧೇ ಫಲಾತಿಶಯೋ ಭವತಿ ನಾಸೀನಸ್ಯೇತಿ ಪರಿಹಾರಾಭಿಪ್ರಾಯಃ ।

ಭಾಷ್ಯಗತಾನಾಯಾಸಪದವ್ಯಾಖ್ಯಾನಮ್ –

ಅವಿದ್ಯಮಾನಾಯಾಸ ಇತಿ ।

ಅನೇನ ಬಹುವ್ರೀಹಿತ್ವಂ ದ್ಯೋತಿತಮ್॥೭॥೮॥೯॥೧೦॥

ಇತಿ ಷಷ್ಠಮಾಸೀನಾಧಿಕರಣಮ್॥